Royal Arctic Linemi aqutsisoqatigiit inissipput
Royal Arctic Line atorfinni pingaarutilinni marlunni pisortanik marlunnik atorfinitsitsivoq.
”Nuannaarutigaara Royal Arctic Linemi aqutsisoqatigiit ataatsimoortut saqqummiussinnaagakkit, suleqatissavummi pikkorissut marluk atorfinni pingaarutilinni marlunni atorfinitsippavut, atorfinitsinneqartullu aappaa ingerlatseqatigiiffiup piginnaanilinnik ineriartortitsinissamut aaqqissuussaanit toqqaannartumik pilersitaavoq”, Royal Arctic Linemi pisortaaneq Niels Clemensen oqarpoq.
Chief Operations Officer
Aputsiaq Lynge juunip aallaqqaataani 2024-mi atorfinissaaq. Taassuma akisussaaffigissavaa pilersuinerup tamarmiusup aqunneqarnera, aammalu ingerlatseqatigiiffiup kisermaassiviusumi niuernikkullu ingerlatsinermi sullissinissamut piumasaqaataasut naammassissallugit. Sulisut 300-t missaanniittut aqutsisuuffigissavai, aamma qullersaqarfimmi umiarsualivinnilu ingerlatsinermut tunngasunik suliassanut aaqqissuussaanikkut akisussaasuussaaq. Aputsiap pitsaassuseq isumannaallisaanerlu, sulisunik ilinniartitsinerup ineriartortitsinerullu qulakkeernissaa kiisalu sulinermi avatangiisinik pitsaasunik sulisullu naammagisimaarinnilluarnissaannik siuarsaanissaq ukkartariniarpai.
Aputsiaq Lynge Air Greenlandimi Ground Operations Manageritut atorfimmeerpoq Cand. merc.HRM-itullu ilinniagaqarluni.
Aputsiaq Lyngep Ivalu Kleist, ukiuni 25-ni Royal Arctic Linemi sulereerluni nutaanik unammilligassaqarniarluni aalajangersimasoq, taarserpaa.
Chief Commercial Officer
John Aage Nielsen apriilip aallaqqaataani 2024-mit Chief Commercial Officeritut atorfinippoq. John Aage Nielsen Royal Arctic Linemi 2020-mi Key Account Manageritut atorfinippoq kingornalu 2021-mi Sullissinermut pisortatut atorfinitsinneqarluni. Taamaattumik suliffeqarfiup iluani piginnaasalinnik ineriartortitsinissamut aaqqissuussineq tunngavigalugu atorfinitsitsisoqarpoq.
John Aage Nielsenip akisussaaffeqarfia tassaavoq ingerlatseqatigiiffiup niuernikkut sullitanullu tunngasutigut suliai, ilaatigullu ingerlatseqatigiiffiup sullitaanik oqaloqateqarnerup nukittorsarneqarnissaa. Niuernermut tunngatillugu kisermaassiviup avataani aningaasarsiornissamut periarfissat ukkatarineqassapput, ingerlatseqatigiiffiup naammassisaqarsinnaassusianik pitsaanerpaamik atuinissaq siunertaralugu.
John Aage Nielsen politiitut ilinniarsimavoq, maannalu aqutsisutut ilinniakkamik ingerlataqarpoq Tuniniaaneq pilersaarusiornikkullu aqutsineq ukkataralugit.
John Aage Nielsenip pisortaaneq Niels Clemensen, pisortaanerugallartutut atorfinitsinneqarnissami tungaanut 2021-mit 2023-mut CCO-usoq, taarserpaa.
Royal Arctic Linemi pisortaqatigiit allat tassaapput pisortaaneq Niels Clemensen, pisortaanerup tullia Aviâja Lyberth Lennert, aningaasaqarnermut pisortaq Jørgen Aqe Møller, suliffeqarfissuarmi sulisoqarnermut pisortaq Bebiane Boye Hansen, umiarsuarnik ingerlatsivimmi pisortaq Anders Bay Larsen aamma IT-mut pisortaq Gustav Fischer.