Arctic Umiaq Line nutaamik pisortartaassaaq

Arctic Umiaq Linep siulersuisui aamma Jens Jakob Sandgreen illuatungeriillutik isumaqatigiissuteqarnermikkut suleqatigiinnertik tamaanga killinniarlugu aalajangerput.

Jens Jakob Sandgreen 2022-mi septembarip 15-iani Arctic Umiaq Linep pisortaatut atorfinitsinneqarpoq. Nioqqutit ingerlatseqatigiiffiup umiarsuaataani Sarfaq Ittummi ullumikkut neqeroorutigineqartut ineriartortinneqarnerat Jens Jakob Sandgreenip pisortaanermini siuttuuffigaa. Ingerlatseqatigiiffiup siunissami atuuffigisassaata isumaliutigineqarneranut aallaaviusussanik periarfissaasinnaasunut nassuiaatit maanna pigineqalernerat Jens Jakob Sandgreenimit aamma qulakkeerneqarpoq. Siulersuisut Jens Jakob Sandgreenip ingerlatseqatigiiffimmut sullissineranut qujaffigerusuppaat siunissamilu ingerlalluarnissaanik kissaallugu.

Pisortamik nutaamik pissarsisoqarnissaata tungaanut Anders Bay Larsen, Royal Arctic Linemi umiarsuarnik ingerlatsivimmi pisortaasoq, ingerlatseqatigiiffimmi pisortaagallartussatut toqqarneqarpoq.

Pisortamik nutaamik atorfinitsitsinissaq siunertaralugu sulisussarsiorneq siulersuisut maanna aallartippaat.