Royal Arctic Line nutaamik angalanermut pilersaaruteqalerpoq

Qaanaap Ittoqqortoormiillu tikinneqartarnerat ilaneqarput

Royal Arctic Line 2024-mi nutaamik angalanermut pilersaaruteqalerpoq, allannguutillu sapaatit akunneranni 9-mit atuutilissapput.

Imarpikkoortaatit ingerlaarfissat ima isikkoqarput:

Avannamut
Aarhus – Reykjavik – Nuuk

Kujammut
Nuuk – Reykjavik – Reydarfjordur – Thorshavn – Bremerhaven – Helsingborg – Aarhus

Avannamut ingerlaarnermi imarpikkoortaatip Nuummut tallimanngornermi ullaakkut tikittarunnaarluni sisamanngornermi ualikkut tikittalernissaa naatsorsuutigineqarpoq, tamannalu Nuummi niuertunut sunniuteqassaaq niuertarfinnut nassiussat tallimanngornermi ullaakkut tunniunneqarnissaat qularnaannerulissammat. Tamanna aamma umiarsuarnut pajuttaatinut nioqqutissanik sinerissamut pajuttuisartunut sunniuteqassaaq kinguaattooratarsinnaanerat annikillisinneqassammat.

Kujammut ingerlaarfimmi Royal Arctic Linep Tysklandimi Bremerhaven siunissami aqqusaartalissavaa, tamannalu avammut toqqaannartumik niuernissamut periarfissanik ammaassaaq, aammali Tysklandimit toqqaannartumik eqqussuinissamut periarfissaqalersitsissalluni, Danmark avaqqullugu.

Qaanaap Ittoqqortoormiillu aqqusaarneqartarneri tamarmik immikkut ataatsimik ilaneqassapput, taamaattumillu illoqarfiit aqqusaarneqartarnerannut pilersaarutaasunut marlunnut taarsiullugu 2024-mi pingasoriarlutik pilersaarutaasumik aqqusaarneqassallutik.

Upernaviup Uummannallu pigisaanni nunaqarfiit aqqusaarneqarnissaannut pilersaarutaareersunut ilassutitut 2023-mit atuutilersumik aqqusaarnermik aappaluttumik ataatsimik aqqusaaqqinneqassapput. Royal Arctic Linelli erseqqissaatigissavaa aqqusaarnerit pineqartut aappaluttuummata, taamaattumillu silap qanoq innera sikoqassusialu apeqqutaatillugit angalanerit aatsaat ingerlanneqarsinnaassallutik. Aqqusaarnerit ilassutigineqartut 2024-mi aamma atuutissapput.

 

PAASISSUTISSAT – Aqqusaarnerit aappaluttut

Royal Arctic Linep angalanissamut pilersaarutai qimerlooraanni sumiiffinni sikusartuni aqqusaarnerit aappaluttumik nalunaaqutserneqarsimasut arlallit takuneqarsinnaapput. Aqqusaarnerit aappaluttumik nalunaaqutserneqarsimatillugit aqqusaarnerit qulakkeerneqarsinnaannginnerat pineqartarpoq, silalli qanoq innera sikoqassusialu apeqqutaatinneqartarluni. Aqqusaarnerit aappaluttut Royal Arctic Linep pilersuisussaatitaaneranut ilaatinneqanngillat.

Aqqusaarnerit aappaluttut nassiussanut pingaarutilinnut, soorlu assersuutigalugu ukiornissaanut peqqumaatissanik pajugutissanut, sanaartornermi atortussanut pinngitsoorneqarsinnaanngitsunut imaluunniit nassiussanut allanut asiujasunut atorneqarnissaat Royal Arctic Linep kaammattuutiginngilaa. Aqqusaarnissaq aappaluttoq iluatsinneqanngitsoorpat usit umiarsuup umiarsualivimmut angerlarsimaffigisaanut oqqunneqassapput, nassiussallu angalanissamut pilersaarutaasumut tullermut uninngasuutigineqassapput tigusisussamit akisussaaffigineqarlutillu akiligassanngortinneqassallutik.