Assartuinermut akigititanik angalanermullu pilersaarutini allannguutit

Naalakkersuisut akuersissuteqarnerisigut, Royal Arctic Line avannamut kujammullu assartukkanut atuuttumik assartuinermut akigititaminik ukiut pingasut iluanni qaffaassaaq. Allannguut siulleq januaarip aallaqqaataani 2024-mi atuutilissaaq, akigititat 6,4%-inik qaffanneqassallutik.  

Akigititanik allannguinissamut ilusiliat assigiinngitsut Naalakkersuisunut Nunatsinnilu inuussutissarsiuteqartunut saqqummiunneqarsimapput. Illuatungeriillu oqaloqatigiinnerisa malitsigisaanik ilusiliamik toqqaasoqarneratigut assartuinermut akigititanik naleqqussaaneq ukiut pingasut iluanni pisussanngortinneqarpoq, assartuinermut akigititat 2024-mi 6,4 %-inik, 2025-imi 3,1 %-inik aamma 2026-mi 2,2 %-inik qaffanneqassallutik. Illuatungeriit naliliinerat naapertorlugu akigititanik qaffakkiartuaartitsinissaq sullitanut atoruminarnerussaaq, qaffaanerup tamarmiusup ataatsikkoortumik ingerlanneqarnissaanut naleqqiullugu.

Tamatumunnga peqatigitillugu tassanngaannartumik akigititanik qaffaasoqarnissaa pinngitsoortinniarlugu aamma aalajangiunneqarpoq siunissami, siullermeertumillu 2025-mit, akigititanik ingerlaavartumik qaffaasoqartassasoq ukiumut 2,5%-inik.

Avannamut nassiussanik assartuinermut akigititat ukiuni arfineq pingasuni allannguuteqarsimanngillat. Aningaasartuuteqarnerulerneq, assartukkat annertussusiisa kinguariartorfiunerat kiisalu umiarsuaatileqatigiiffiup umiarsuaataanut siunissami aningaasalersuinissat pissutigalugit ingerlatseqatigiiffiup akigititaminik ataatsimoortumik qaffaasariaqarnera allaqqunneqarsinnaajunnaarpoq. 

Angalanermut pilersaarummut pingaarnermut allannguutit

Akigititanik allannguinerup peqatigisaanik Royal Arctic Linep 2024-mut angalanermut pilersaarutaa pingaarneq nutaaq Naalakkersuisunit akuerineqarpoq. Angalanermut pilersaarummi pingaarnermi nutaami Imarpikkut ingerlaarfimmi kujammut ingerlaarnermi Bremerhaven aqqusaarneqartalissaaq, tamannalu ingerlatseqatigiiffiup sullitaanut Tyskland aqqutigalugu toqqaannartumik niuernissamut periarfissaqalersitsissaaq. Aamma umiarsuaatileqatigiffiup Tysklandip, Danmarkip Islandillu akornanni niuerfimmut aningaasarsiorfiusumut ilanngunnissaanut periarfissiissaaq. Angalanermut pilersaarut nutaaq sapaatit akunneranni 9-mi atuutilertussatut naatsorsuutigineqarpoq, BRU407-ip angalanermini Bremerhavenimit aallarneranut atatillugu. Angalanermut pilersaarut nutaaq ingerlatseqatigiiffiup nittartagaani nassaarineqarsinnaavoq.

Tamatumunngalu peqatigitillugu Naalakkersuisut noqqaassuteqarnerisigut Qaanaap aamma Ittoqqortoormiit aqqusaarneqartarnerat ukiumut aqqusaarnermik ataatsimik ilaneqarput, kiisalu Upernaviup Uummannallu pigisaata angallavigineqartarnerat sivitsorneqarluni, ukiumi kingusinnerusukkut angalanerit aappaluttumik nalunaaqutsikkat ilaneqarlutik, tamannalu 2023-mit aallartereerniarlugu toqqarparput.