Royal Arctic Linep Silver Linerillu Nunatsinni ilinniartitaanikkut suliniutit tapersersorpaat

Royal Arctic Line aamma Silver Liner Nunatsinni ilinniartitaanermik tapersersuiumallutik Kommandør G. de Lichtenbergs Fondimut 100.000 koruuninik tunissuteqarput.

Aningaasat tunissutigineqartut Mary Arcticap Silver Linerimut tunineqarneraneersuupput, umiarsuup 2005-imi atserneqarnerata kingorna eqqumiitsuliat umiarsuarmi pinnersaatigineqartut immikkut tunineqarsimallutik.

Nunatsinni inuusuttut tapersersorlugit umiarsuarmi ilinniarfimmi Georg Stagemi ilinniartitaanermut aaqqissuussinermut akeqanngitsumik peqataanissaannut aningaasat atorneqassapput. Ilinniartitaanermut aaqqissuussinermi imaatigut angalaneq, sumiissusersiorneq imarsiornermilu suliassat ukkatarineqarput, tamannalu inuusuttut suliaqarfiit pineqartut iluanni ineriartornissaannut asseqanngitsumik periarfissiivoq.

”Taama tunissuteqartoqarneratigut kalaallit inuusuttut imarsiornerup iluani sulinissaminnik toqqaaneranni tapersersorsinnaagatsigit nuannaarutigaarput, Nunatsinnimi pisariaqarteqaagut”, Royal Arctic Linemi Tuniniaanermut pisortaq, Niels Clemensen, oqarpoq.

Nunatsinnilu ilinniartitaanermik tapersersuinissamik anguniagaqarneq Silver Linerimit aamma siunertarineqarpoq. ”Silver Maryp pisiarinera tulluusimaarutigalugulu nuannaarutigaarput Kalaallillu Nunaata Royal Arctic Linellu suleqatigilluarnissaat qilanaarivarput”, Tormod Fossmark, Silver Linerimeersoq oqarpoq.

Kommandør G. de Lichtenbergs Fondimi siulersuisuinut siulittaasup Rasmus Lohsep aningaasanik tunissuteqartoqarnera qujamasuutigeqaa, kalaallit inuusuttut suli amerlanerusunut imarsiornermik ilinniagaqalernissaannut iluaqutaalluassammata.

”Siulersuisut namminneq kajumissutsiminnik suliaqartuusut taama tunissuteqartoqarnera kajumissaatitut isigaat inuusuttunillu tapersersuinissamik suliaqaqqinnissatsinnut iluaqutigilluarneqarnissaat qularutissaanngilaq. Aningaasaateqarfiup 1962-imiilli inuusuttut Kalaallit Nunaanneersut 300-t missaat ilinniariartortissimavai – pingaartumik Umiarsuarmut ilinniarfimmut Georg Stagemut.
Inuinnarnit suliffeqarfinniillu taama tapersersorneqartiginngikkaluarutta iluatsissinnaanngikkaluarparput. Nuannaarutigeqaarpullu aningaasaateqarfik eqqarsaatigisimagassiuk inuusuttullu pillugit sulinerput tapersersorusukkassiuk. Royal Arctic Line aamma Silver Liner suleqatigiilernerannik pilluaqquagut tunissutaannullu maniguulluta qujavugut”.

Ataatsimoorluni 100.000 koruuninik tunissuteqarneq aningaasaateqarfiup ilinniartitaanikkut suliniutaanik nukittorsaassaaq Nunatsinni inuusuttut immikkuullarissumik misigisaqartinnissaannut imarsiornerullu iluani sulilernissamut qajannaatsumik toqqammavissaqartitsissalluni.