Tukumap kinguaattoornera containerit ingerlaartinneqartut nikingassuteqarallarnerannik kinguneqarpoq

Tukuma Arcticap aserortooqqarnerata malitsigisaanik umiarsuaatileqatigiiffimmi containerit ingerlaartinneqartut nikingassuteqalerput. Tamannalu containerinut qerititsivinnut avammut nioqqutinut atugassanut aamma containerinut nalinginnaasunut eqqussukkanut atugassanut sunniuteqarpoq. Umiarsuaq utaqqiisaasumik taartaatinneqarluni angalatinneqartoq Tukuma Arcticatulli useqartigisinnaanngilaq, tamannalu containerinik imaqanngitsunik assartuinermut akornusersuutaasumik sunniuteqarpoq.

Containerit ingerlaartinneqartut nikingassuteqalernerat septembarip qaammataata qiteqqunnerani iluarsisimassasoq naatsorsuutigaarput. Pisumilu unammillernartumi matumani pitsaanngitsumik sunniutaasinnaasut annikillisarneqarnissaat ilungersuullugu sulissutigineqarpoq. Nunatta Kitaata sineriaani aalisarneq qaffasissumiippoq tulaassanillu terminalitsinnut inniminnikkat aamma qaffasissumiillutik, avammulli nioqqutissiortutsinnit inniminnikkat ilisimaneqartut tunngavigalugit containerinik qerititsivinnik pisariaqartitsineq naammassisinnaassallugu naatsorsuutigaarput.

Nunatsinnut eqqussassanik usissanut tunngatillugu containerinik 20’-inik aamma 40’-inik amigaatigineqartunut taarsiullugu usinut nalinginnaasunut containerit qerititsiviit 40´-t sullitatsinnut annertunertigut neqeroorutigineqassapput containerit ingerlaartinneqartut nikingassuteqarnerisa oqimaaqatigiisseqqinneqarnissaasa tungaanut.

Nikingassuteqartoqalernerata iluarsinissaata qanoq pingaaruteqartiginera paasilluarsinnaavarput nalinginnaasumillu ingerlasoqaqqilernissaa pimoorullugu sulissutigaarput. Pisumi matumani sullitatsinnut suleqatigisatsinnullu unammillernartoqalernera ajuusaarutigaarput.

Aammattaaq sinerissami angallannerup ullunik 2-3-nik kinguaattoorfiunissaa naatsorsuutigineqartariaqassaaq septembarimi sapaatit akunnerisa aappaata tungaanut.

 

Tukuma Arcticami ima pisoqarpoq
Umiarsuup aserortooqqarnerani pisoq qaqutigoorluinnartuuvoq bæreleje pingaarutilik motoorip pingaarnerup sarpimmut akselianit Tukuma Arcticap sarpianut najummisoq akornuteqalermat. Bærelejep akornutaa immikkut ilisimasalinnit iluarsartuunneqarpoq piffissaq iluarsartuunneqarnissaanut atorneqartoq sapaatit akunnerannut ataatsimut sivikillineqarluni. Lejemik nutaamik pissarsinissaq nalinginnaasumik sapaatit akunnerinik arfinilinnik sivisussuseqaraluarpoq.