Tasiilaq

Tasiilami sapaatit akunnerat kingulleq sakkortuumik piterarnera sanaartornermi atortussanik pisariaqartitsinermik annertuumik kinguneqarpoq, taakkulu pissarsiarisinnaanerat sivisuvoq.

Tamatuma malitsigisaanik Royal Arctic Linep umiarsuarmik decembarip qaammataani Tasiilaliartitseqqinnissamut periarfissaqarnersoq misissorpaa. Tasiilamut umiarsuaq kingulleq novembarip qulingani aqqusaartussatut pilersaarutigineqaraluarpoq.  

Tasiilap decembarimi tikinneqarsinnaaneranut sila sikoqassusialu soorunami apeqqutaassapput, Royal Arctic Linellu suliassamut tamatumunnga umiarsuarmik allamukartumik aqqusaartitsisoqarsinnaaneranut periarfissanik misissueqqaarallarpoq. Sanaartornermilu atortussanik pisariaqartinneqartunik pissarsinissap umiarsuarmik aqqusaartitseqqinnissamut ataqatigiissaarneqarnissaa qulakkeerniarlugu Iserit A/S oqaloqatigineqarpoq. Royal Arctic Linep qanoq pisoqarnissaa pillugu sapaatit akunnerata matuma naannginnerani erseqqinnerusumik nalunaaruteqarsinnaassalluni naatsorsuutigaa.