Tasiilap immikkut ittumik umiarsuaqaqqinnissaa Nanoq Arcticamik pissaaq

Tasiilami 2022-mi septembarip qaammataani piterarnerata kingunerisaanik igalaat 120-t sinnerlugit taarsersorneqartariaqalerput. Igalaallu pineqartut taartissaat umiarsuarmut Tasiilamut naggataartussamut ajoraluartumik angumeqqussinnaasimanngillat. Taamaattumillu umiarsualeeqqittoqarnissaanik Royal Arctic Line aalajangerpoq. Immikkullu ittumik umiarsuaqaqqinnissaa Irena Arcticamik pisussatut pilersaarutaagaluarpoq usilli taama killeqartigitillugit ingerlatsinermut tunngatillugu tamanna pisinnaanngilaq. Taamaattumillu umiarsuaqaqqinnissaa Nanoq Arcticamik maanna pisussanngorpoq umiarsuaq Nuummiit Tasiilaliartinneqassalluni.

Ukiup taamaalinerani silap qanoq innissaa nalunartarmat umiarsuaq qaqugorpiaq tikissanersoq oqaatigineqarsinnaanngilaq, kisianni naatsorsuutigineqarpoq umiarsuaq decembarip sisamaani Nuummiit aallassasoq, decembarillu 7-iani Tasiilamut apuussimanissaa neriuutigineqarpoq. Silamullu tunngatillugu nalorninartoqarnera pissutigalugu siornatigut nalunaarutigineqartumut naleqqiullugu nassiussanik qerinngitsunik taama amerlatigisunik nassartoqarnissaa naleqqussorineqanngilaq.