Malik Arcticap annertuumik ajoqusersimanera pissutaalluni Qaanaap tikinneqarnissaa kinguarpoq
Amutsivimmi amuneqarsimanermut atatillugu Malik Arctica annertuumik ajoqusersimasoq paasineqarpoq, tamanna pissutaalluni umiarsuup pilersaarutaasumik amutsivimmiinnissaa sapaatip akunneranik ataatsimik sivitsorneqarpoq. Tamatuma kinguneranik umiarsuaq siulleq Qaanaamut tikittussaq kinguaattuussaaq, ulloq tikiffissaq tassaalerluni juulip arfineq-aappaat 2022.
Tamanna sioqqullugu Malik Arcticap Qaanaamut qaqugorpiaq tikinnissaa nalornissutigineqareerpoq sumiiffimmi sikoqarnera pissutaalluni. Ukioq manna sumiiffinni amerlasuuni sikoqarnera pissutaalluni umiarsuit tikinnissaannut tunngatillugu unamminartoqartarsimavoq, taamatut aamma ippoq Qaanaap eqqaani. Tikinnissap allanngortinneqarnera annertunerusumik sunniuteqarnavianngilaq usingiaanissap ingerlaannaq aallartinneqarnissaa pitsaanerulertussaassammat.
Amutsivimmi inuit 40-t ilungersorlutik sulipput umiarsuaq aallarnissaanut piareersarlugu, maannakkullu amutsivimmiinnerani piffissaq sapinngisamik sivitsorsarniarnagu kiisalu suli kinguaattooqqinnissaq pinaveersaartinniarlugu.