Ukiumoortumik nalunaarut 2020
Royal Arctic Linemi ullumi ataatsimeersuartoqarpoq ukiumoortumillu nalunaarusiaq taamaalilluni aamma saqqummersinneqarluni.
Royal Arctic Linep assartuinermi aaqqissuussinera nutaaq Islandimi umiarsuaatileqatigiiffik Eimskip suleqatigalugu 2020-mi atulerpoq. Assartuinermi aaqqissuussineq nutaaq Kalaallit Nunaata tamakkerlugu niueqatiginerata ajornannginnerulersinnissaanut qajannaatsumik toqqammavissiivoq.
Tamatumanilu sunniutissat pingaarnersaat tassaavoq Atlantikukkut ukioq kaajallallugu sapaatit akunnikkuutaartumik maanna assartuisoqalernera Royal Arctic Linellu umiarsualivinnut nutaanut amerlanerusunullu aqqusaartalernera, tassunga ilaallutik Århus, Helsingborg, Torshavn, Reykjavik aamma Reydafjordur ukioq kaajallallugu sapaatit akunneri tamaasa aqqusaarneqartalersut.
Assartuinermi aaqqissuussineq nutaaq nioqqutissanik eqqussuinermut avammullu nioqquteqarnermut periarfissanik nutaanik ammaassivoq, nunatsinnut nunatsinniillu nassiussat aqqutit nutaat atorlugit umiarsualivinnut pineqartunut maanna nassiunneqarsinnaanngormata. Tamannalu ilaatigut nunarsuarmi niuerfinnut toqqaannarnerusumik avammut nioqquteqarnissamut periarfissaqalersitsivoq. DHL Global Forwardingimik suleqateqarneq aallartinneqarpoq, taannalu Royal Arctic Line sinnerlugu Islandimi sullissisuuvoq Islandip Skandinaviallu akornanni tunisat annerusarnissaat siunertaralugu, taamaalillunilu aamma Nunatsinnut allatigut aningaasatigut iluanaaruteqarnissamut periarfissaqalersitsilluni.
Royal Arctic Linep suleqatigiinnerni nutaani periarfissat ingerlaavartumik ineriartortinniarpai Nunatta nunarsuaq tamakkerlugu assartugalerinikkut aaqqissuussinermut akuulersinnissaanut anguniagaqarnini piviusunngortikkumallugu. Taamatuttaarlu umiarsuaatileqatigiiffiup soqutigisallit oqartussallu suleqatiginiarpai Nunatta aningaasaqarnerata siuariartortinnissaanut atugassarititaasut pitsaanerpaat pilersikkumallugit.
Umiarsuit nutaat pingasut Royal Arctic Linemut tunniunneqarput, Tukuma Arctic, Nanoq Arctica aamma Siuana Arctica. Tunu Reykjavik aqqutigalugu Nanoq Arcticamik attavilerneqarpoq ukiumullu amerlanerusunik aqqusaarneqartalerluni, Siuana Arcticallu atulerneratigut umiarsuaatini isorliunerusunik pajuttuisuusut nutarterneqarnerat aallartippoq umiarsuarnillu nutaanik allanik pingasunik malitseqassaaq, taakkununnga ilaallutik nunaqarfiliartaateeqqat marluk 2021-mi tunniunneqartussat. Nutaanik umiarsualiortitsineq ingerlatseqatigiiffiup oqimaaqatigiissitsinerani takuneqarsinnaavoq DKK 1,3 milliardinit DKK 1,6 milliardit sinnilaarlugit amerleriaateqarlutik.
Assartukkat annertussusaat 2020-p affaani kingullermi aamma pitsaasumik ineriartorfiupput, Royal Arctic Linelu akileraannginnermi DKK 2 millioninik angusaqarpoq (2019: DKK 27 millionit), tamannalu pisortaqatigiinnit naammagisimaarneqarpoq, pingaartumik Coronap sunniutigisai ataasiakkaat DKK 40 millionit sinnerlugit ilanngullugit naatsorsorneqarmata tamatumunngalu peqatigitillugu pilersaarusiornikkut anguniakkat pingaarutillit anguneqarmata.
Naatsorsuutit - Royal Arctic Line (ral.gl)