Nunaqarfiliartaammik Upernavimmi atsiinissaq

Umiarsuaatileqatigiiffiup umiarsuaataa nutaaq Siuana Arctica sapaatip akunnerani tullermi Upernavimmi atserneqalerpat Royal Arctic Line umiarsualivimmi nalliuttorsiortitsinissamut qaaqqqusivoq.

Umiarsuaaqqamik atsiisussaq Upernaviup, Siuana Arcticap kiffartuussiffissaata, inuisa akornanni toqqammaveqarluarpoq:  

Louise Karlsen – Upernavimmi Royal Arctic Linep umiarsualiviani pisortaq

29-nik ukiulik Upernavimmiu Louise Karlsen Siuana Arcticamik, Upernavimmut eqqaanilu nunaqarfinnut ullumikkut pajuttuulereersumik, atsiissaaq.

Louisep ukiuni 3 ½-ini terminalimi sulisussatut ilinniarnini, ilinniaqatini angutit sisamat peqatigalugit 2020-mi naammassivaa, atuagarsorninilu qaffasinnerpaamik ”A”-mik naggaserlugu.

Kingorna Upernavimmi terminalarbejderitut sulivoq, 2021-mi januaarip qaammataani umiarsualivimmi pisortatut atorfininnissami tungaanut. Royal Arctic Linemi pisortatut aqutsisutullu atorfiit amerlasuut arnanit inuttaqartiterput, soorlu umiarsuarmi aquttutut, umiarsuup naalagaatut aamma værkstedimi umiarsualivinnilu pisortatut atorfiit, Louiselu atorfilinnut taakkununnga ilaavoq.

2016-imili sulisoqarnerup iluani qarasaasiatigut aqutsissut Royal Arctic Linep atulerpaa, inuttut ineriartornerup suliffeqarfiullu pisariaqartitaasa illugiissillugit atorneranni naammassisassat pitsaanerpaameeqqullugit.

Sulisut ineriartortut amerliartortillugit amerlanerujartortut akisussaaffimmik tigusinissaminnut nukissaqaleriartussapput. Sulisumut, suliffeqarfimmut inuiaqatigiinnullu iluaqutaasumik.

Kinguaariinnut akisussaaffimmik tiguserusuttunut tullernut Royal Arctic Line inissaqartitserusuppoq, taamaattumik Louise Karlsen – inooqatigisanilu ataatsimik ukiulimmik erneqartoq – umiarsuaatileqatigiiffimmi inuiaqatigiinnilu maligassiuilluartutut isigaarput.   

Siuana Arctica, maanna Upernavimmi eqqaanilu sulilereersoq, Louise Karlsenip atsissavaa ataasinngornermi juulip 12-ianni 2021 nal. 14:00 Upernaviup umiarsualiviani nalliuttorsiualaarluni katerinnikkut. Upernavimmiut tamarmik pisussamut qaaqqusaapput.

Upernavimmi atsiisoqareerpat – aammalumi Uummannami umiarsuaaterput nutaajunerpaaq ”Maleraq Arctica” tallimanngornermi juulip 16-ianni 2021 atserneqareerpat – innuttaasut ”umiarsuaatiminni” takornariartinneqarnissaminnut periarfissinneqassapput, umiarsualivimmi kaffillernerup nipilersornerullu nal. 17:00-ip tungaanut ingerlasussap nalaani.