Taamaattumik umiarsuaativut Danmarkimi nalunaarsugaapput
Royal Arctic Linep nunaqarfiliartaatitaava kingulleq, Siuana Arctica, Uummannap nunaqarfiinut qerisunik aallerluni maanna avannaaniittoq, danskit erfalasuannik erfalasoqarpoq Odensemilu, Upernaviup illoqarfittut ikinngutaani, angerlarsimaffeqarluni. Siuana Arcticap aasarumiit Upernavik nunaqarfiilu qulingiluat, Royal Arctic Linep Qasigiannguani umiarsualivianiit pajuttuuffigissavai.
Siornatigut nalunaarutaagaluarpoq nunaqarfiliartaatit nutaat sisamat, Siuana Arctica, Maleraq Arctica, Arpaarti Arctica aamma Tilioq Arctica kalaallit erfalasuannik erfalasoqassasut. Aningaasartuutissalli pinerullugit umiarsuaatileqatigiiffiup naggataatigut aaliangertariaqarsimavaa umiarsuit danskit erfalasuannik erfalasoqassasut.
Danskit erfalasuannik erfalasoqarnerat Danmarkimilu angerlarsimaffittut umiarsualiveqarnerat akileraartarnermut inatsimmik, DIS-imik aaqqissuussinertut taasamik, tunngaveqarpoq. Umiarsuaq Dansk Internationalt Skibsregister-imi (DIS-imi) nalunaarsugaasimagaangat umiarsuup inuttai akileraartussaatitaaneq ajorput. Umiarsuit taamatut nalunaarsugaanerat pissutigalugu Royal Arctic Linep inuttaatitai taamaalillutik Danmarkimut akileraarneq ajorput. Nunaqarfiliartaatit Kalaallit Nunaanni nalunaarsugaasimasuuppata umiarsuaaqqani taakkunani inuttat Kalaallit Nunaannut akileraartussaasimassagaluarput, taamalu umiarsuarni allani inuttat akissarsiaannut nalimmassassappata ingerlatsineq akisunerusimassagaluarluni.
Taamaattumik DIS-imiinnissamik toqqaanermi pissutsit marluk isumagineqarput: Umiarsuaatileqatigiiffiup umiarsuaataasa sinnerini inuttat akissarsiaasa assinginik nunaqarfiliartaatini inuttat akissarsiaqarnissaat, Royal Arctic Linellu akileraarutinik akilersuisitsinissamut allaffissornermullu sipaaruteqarnera, taamalu assartuinermi akinik massakkut atuuttunik taamaaginnartitsisinnaanera.
Inuiaqatigiit nalinginnaasumik ineriartornerat eqqarsaatigalugu Royal Arctic Line ”pisariaqanngitsunik” akilersugassiorsinnaanngilaq. Taamaattumik ingerlatseqatigiiffik assartuinermi akinik sapinngisamik qaffaanaveersaartariaqarpoq. Akileraannginnissamik isumaqatigiissuteqarsimatinnata kalaallit erfalasuannik erfalasulerneq assartuinerup akiisa qaffannerannik kinguneqassaaq. Umiarsuarnut mikinernut akileraannginnissaq periarfissaasimasuuppat ingerlatseqatigiiffiup soorunami kalaallit erfalasuat toqqarsimassagaluarpaa. Aamma umiarsuaatileqatigiiffimmut allaffissornerunermik nassataqarsimassasuuppat. Kalaallit Nunaanni ingerlatsiviuvugut, tamannalu tulluusimaarutigaarput.
- Taamaattumik Kalaallit Nunaanni nunat tamalaat umiarsuaataasa nalunaarsorneqarfiannik peqanngikkallartilluta aaqqiissutitut toqqagarput illuatungeriinnut pitsaasuuvoq. Sarfaq Ittummi inuttanut tunngatillugu DIS-imut assingusumik isumaqatigiissuteqarpugut, neriuutigisimagaluarparpullu aaqqissuussineq taanna nunaqarfiliartaatitsinnut atuussinnaassasoq. Tamannali inatsisinut ullumikkut atuuttunut atatillugu pisinnaasimanngilaq, Royal Arctic Linemi umiarsuarnut akisussaasoq Anders Bay Larsen oqarpoq.
Umiarsuit anginerit, soorlu Tukuma Arctica, Malik Arctica Mary Arcticalu, nunat tamalaat umiarsuarnut nalunaarsorneqartarfianni nalunaarsugaasariaqarput, niuffagiutaagamik nunanilu allani umiarsualivinnut tikittarlutik. Umiarsuit erfalasup ataatsip ataaniittut aqukkuminarnerupput, umiarsuaatileqatigiiffimmullu – aammalu inuttanut – ajornannginnerusumik nikeriarsitsisinnaallutik. Aamma ilinniartunik ikisitsinissaq pisariinnerusarpoq.
Royal Arctic Linep nunaqarfiliartaatissaa tulleq tassaavoq Maleraq Arctica, Uummannami eqqaanilu aaliangersimasumik pajuttuussussaq, upernaallu ingerlanerani Nunatsinnut tikittussaq. Maleraq Arcticap taamaalilluni Helsingør angerlarsimaffittut umiarsualivigissavaa, Helsingørip Uummannaq illoqarfittut ikinngutigimmagu.