Siuana Arctica tikilluarit
Royal Arctic Linep nunaqarfiliartaatitaassaasa sisamaasut siullersaat, Siuana Arctica, apriilip 12-ianni silagissorsuugaa Nuummut tikippoq. Umiarsuaq 67 meterisut takitigisoq Upernavimmi angerlarsimaffeqassaaq, aasarumiit illoqarfik taanna nunaqarfiilu qulingiluat Avannaani umiarsualivimmit qitiusumit, Aasianniittumit, pajuttuuffigissallugit.
Siuana Arcticali ingerlaannaq sulilissaaq ullualuit qaangiuppata Aasiaat aqqusaarlugit Uummannap tungaanut aallassagami, Saattuni Ikerasammilu qerititsiviit aallerfigiartorlugit. Siuana Arctica sikukkut aqqutissiuunneqassaaq – Mary Arctica sapaatip akunnerata naanerani nunaqarfiliartaat malillugu aallassammat, siullermik Saattunut kingornalu sikumik aserorteriitigaluni Ikerasammut.
Siuana Arctica palitsinut 500-t missarpiaannut inissaqartitsivoq, qaleriissikkaannilu 1000-inut. Siuana Arcticap, Aasianni usingiareersimaleruni, Uummannaq eqqaalu ukioq manna angallavigisinnaanngorlugu taamaalilluni ”ammaatissavaa”.
Siuana Arctica saneqqamigut elevatoreqarpoq marlunnillu kivittaateqarluni, umiarsuarlu 12 knobit angullugit sukkassuseqarsinnaavoq. Nunaqarfiliartaatit nutaat sananeqarneranni umiartortunngornianut kalaallinut inissaqartitsinissaq ilanngunneqarpoq. Taamaalilluni Siuana Arcticami ilinniartut pingasut issimasorineqarsinnaapput.
Vestlandia, ukiorpaaluit Royal Arctic Linemit attartugaalluni Upernavimmiunut eqqaamiuinullu pajuttuusimasoq, Siuana Arcticap kingoraassavaa.
Siuanap isumaa tassaavoq siulersorti, siorleq imaluunniit siuttoq. Siuana Arcticalumi nunaqarfiliartaatissanut tullernut pingasunut, ukioq manna tunniunneqartussatut Royal Arctic Linep naatsorsuutigisaanut, Uummannami, Nunatta kujataani Qeqertarsuullu tunuani pajuttartussanut siulersortaavoq.