Piujuartitsinissamik suliniuteqarneq Royal Arctic Linep annertusarniarpaa

Royal Arctic Linep 2020-mut CSR pillugu nalunaarusiani saqqummiuteqqammerpaa. CSR pillugu nalunaarusiaq ingerlatseqatigiiffiup nittartagaatigut pissarsiarineqarsinnaavoq.

Ingerlatseqatigiiffiup silap pissusianut, avatangiisinut inuiaqatigiinnullu sunniutaata uuttortarnissaanut toqqammavissamik pilersitsinissaq Royal Arctic Linep 2020-mi sulissutigaa. Taamaliornissamullu allaffissornikkut isumaginnittoqarnissaa suliassallu pingaarnersiuinermi salliutinneqarnissaa pisariaqarpoq, taamaattumillu silap pissusianut, avatangiisinut inuiaqatigiinnullu sapinngisamik annertunerpaamik naleqalersitsisinnaasunik toqqartuisinnaanissatsinnut ikorfartuisussamik, minnerunngitsumillu ilorraap tungaanut ingerlasoqarneranik uuttortaanissamik, suliaqartitsisoqalerpoq.

Suliaq taanna 2021-mi ingerlateqqissavarput, silallu pissusianut nammakkiutaasunut naatsorsuutinik eqqornerusunik suliaqarsinnaanissamut toqqammavissamik suliaqarneq aallartissavarput. Silap pissusianut nammakkiutaasunut naatsorsuutinik eqqornerusunik saqqummiussissagaanni tamatuminnga suliaqartussat, paasissutissanik eqqortumik katersuinissaq nalunaaruteqartarnissarlu pisariaqarpoq, inuiaqatigiinnilu susassaqartut allat suleqatiginissaat aamma pisariaqarluni. Suleqatigiinnerlu taanna 2020-mi eqeersimaartumik atorluarparput, siunissamilu aamma ingerlatiinnarniarparput.

Naalakkersuisut, naalakkersuisoqatigiinnissamik isumaqatigiissut nutaaq tunngavigalugu, Naalagaaffiit Peqatigiit nunarsuarmi anguniagaannut 17-inut tunngatillugu suliniuteqarnissamut tigussaasunik anguniagaqarnissaat Royal Arctic Linemi isumalluarfigaarput. Piujuartitsinissamik suliniuteqarnerup annertusarnissaanut inuiaqatigiinni ataatsimoorluni suliniuteqarneq ataatsimoorfiusumik siunnerfeqarnikkut nukittorsarneqassaaq.

Kalaallit Nunaanni ingerlatseqatigiiffiuvugut, inuiaqatigiillu kalaallit tamaasa piujuartitsinissaq tunngavigalugu ineriartortinnissaasa eqeersimaartumik peqataaffiginissaanut pisussaaffeqarlutalu akisussaaffeqarpugut. Nunatsinni sulisinnaasut ilinniartinnissaat piorsaavigeqqinnissaallu siunnerfilimmik sulissutigaarput. Piffissaq ungasinnerusoq eqqarsaatigalugu pilersaarusiornikkut silap pissusianut avatangiisinullu sunniuteqarnitta annikillisarnissaanut aaqqiissutissarsiorpugut, aamma najukkami suliniutigineqartunik tapersersuinerput umiarsualigut aqqutigalugit ingerlatiinnassavarput. Nunatta tamarmiusup niueqatiginissaanut pitsaanerpaanik atugassaqartitsinissamik anguniaqarnitsinnut peqatigitillugu Nunatta piujuartitsinissamik tunngaveqarluni ingerlanerata ineriartortinnissaa pitsaasumik aamma suleqataaffigerusupparput.

Nalunaarusiaq uani atuarneqarsinnaavoq https://www.ral.gl/media/1099107/2020_csr_gl_web.pdf