Kujataani nunaqarfinnut pajuttuinerit kinguaattoorfiusut
Angaju Ittuup motooriminik ajornartorsiuteqarnerata sivitsortup kingunerisaanik Kujataani nunaqarfinnut pajuttuinerit kinguaattoorfiupput.
Kujataani pajuttuinermi oqilisaassisussatut Adolf Jensen attartorneqarpoq. Umiarsuup usisinnaassusia nassiussat annertussusiannut naammanngilaq, soorlu aamma umiarsuaq qerisunut inissaqartitsinngitsoq, taamaammat nunaqarfiit ilaannut nassiussanik suli assartugassaqarpoq.
Ivalo Arctica sapaatit akunnerata naanerata ingerlanerani kujammut aallassaaq, nassiussanik useqassaaq peqatigisaanillu sumiiffimmi nunaqarfinnut nassiussat apuussornissaannut suliniuteqarnermi annertusaaqataassalluni. Nunaqarfiit amerlanersaannut nassiussanik assartugassaqarpoq pingaartumilli Arsuk eqqugaaqqavoq.
Royal Arctic Linep taamatut inissisimasoqarnera ajuusaarutigaa nassiussallu pingaarnersiorneqarnissaat sapinngisamillu sukkanerpaamik apuunneqarnissaat qulakkeerniarlugu KNI suleqatigineqarpoq.
Angaju Ittummut kingoraartissat suli utaqqineqarput, sunalu tamarmi pissusissamisut ingerlassappat sapaatit akunnerata tulliata ingerlanerani angalaqqilersinnaassaaq.
Angaju Ittuk 80-ikkut aallartinneraneersuuvoq. Umiarsuit ilaatigut Angaju Ittummik taarsiisussat Spaniami maannakkorpiaq sananeqaleruttorput umiarsuillu 2021-mi ukiakkut tunninneqarnissaat naatsorsuutigineqarpoq.