Royal Arctic Linep Covid-19-imut upalungaarsimaniarneq nalinginnaasoq atoqqilerpaa

Royal Arctic Linep umiarsuaata Danmarkimiittut ilaanni inuttap tunillanneqarsimaneranik umiarsuaatileqatigiiffiup sapaammi marsip 29-ani 2020-mi ilisimatinneqarnerata kingorna, umiarsuarni upalungaarsimaniarneq annertusisaq atorneqalerpoq.

Inuttap allap misissortinnerani tunillanneqarsimannginnera paasineqarmat umiarsuit COVID-19-imut upalungaarsimaniarnerat nalinginnaasoq maanna atoqqilerpoq.

Royal Arctic Linep umiarsuai Danmarkip Nunattalu akornanni angalapput, umiartortuvullu sumiiffinnit inuiaqatigiinni tuniluuffiusunit assigiinngitsuneersuupput. Taamaammat umiartortuvut aamma tunillanneqaratarsinnaapput, Nunattalu pilersornerata attatiinnarnissaa pillugu taama atugassaqartitaallutik sulipput. Tamannalu pissutigalugu Royal Arctic Line COVID19-imut upalungaarsimajuarpoq, nappaammullu ersiutaasinnaasut inuttanit eqqumaffigineqaqqissaarlutik. Tamatuma saniatigut aamma umiarsuit Nunatsinni umiarsualivinnut aqqusaarnerinut atatillugu inuttat inunnut allanut qanillinaveersaarnissaannut tunngatillugu umiarsuarni killilersuisoqarpoq.

Umiarsuarmi Danmarkimiittumi, inuttap tunillanneqartup ilaaffigisimasaani, upalungaarsimaniarneq ulluni makkunani pissusissamisoortumik immikkut annertusineqarpoq, ersiutaasinnaasullu annikikkaluartut tamaasa iliuuseqarfigineqassapput. Taamaakkaluartoq umiarsuarmi sulineq pisarnertut ingerlavoq, Nunarput pillugu. Inuttat pisumut tunngatillugu paasinnilluarlutik pissuseqarnerat Royal Arctic Linemit tulluusimaarutigaarput.

Pisoq Nunatsinni tunillaassuuttoqarsinnaaneranik allanngortitsinngilaq, tunillatsittoqarneranillu matumani pisoq Royal Arctic Linep naammassisutut isigalugu umiarsuarni COVID19-imut upalungaarsimaniarneq nalinginnaasoq ingerlateqqippaa.

Paasisaqarnerorusukkaanni Pisortaanerup tullia Aviâja Lyberth Lennert attavigineqassaaq,
oqarasuaat 34 91 03, mail avll@ral.gl.