Royal Arctic Line ajornartoortoqassagaluarpat piareersimavoq

Royal Arctic Line aalajaatsumik suli ingerlaarpoq. Kalaallit Nunaat paaraarput, taamaattumik sulisuvut aamma paaraagut. COVID-19’imit eqqugaanissarput piareersimaffigaarput, aatsaammi taamatut eqqarsartilluta Kalaallit Nunaannut Kalaallit Nunaanniillu pilersuinerput qulakkeersinnaavarput. Aatsaat taamatut eqqarsarnitsigut akisussaaffipput naammassisinnaavarput.

Kalaallit Nunaanni innuttaasut toqqissisimanerunissaannut suleqataarusuppugut. Toqqissisimaneq, nioqqutissanik tamanut naammattunik assartuinitsinnik tunngavilik, toqqissisimanerlu, inuiaqatigiit aningaasarsiorsinnaanissaannut avammut nioqqutissiaatitta assartorsinnaanerannik tunngavilik.

Umiarsuaatileqatigiiffiup upalungaarsimatitaasa tunillaassuuttumik napparsimasoqalissagaluarutta qanoq iliornissatsinnik arlalinnik pilersaarusioreerput. Pilersaarutit taakku malillugit suliffeqarfitsinni coronamit napparsimasoqalissagaluarpat Kalaallit Nunaat tamaat pilersortuarsinnaavarput aalisakkallu nioqqutissiagut nunarsuarmut assartorsinnaallutigit, nunarsuarmi pissutsit atuuttut pissutigalugit Kalaallit Nunaata aningaasaqarnikkut eqqugaanera sapinngisamik annikitsuutikkumallugu.

Royal Arctic Line inuiaqatigiinni pingaarutilimmik suliassaqarpoq. Suliassat tamakku inunnit Royal Arctic Linemi sulisunit naammassineqartarput, taamaattumik sulisugut paaraagut. Suliffeqarfissuarmi, umiarsuarni, umiarsualivinni nunamilu allaffinni immikkoortortaqarfikkaartumik sulisut marlunnut avissimapput, imminnut takuneq ajortunik, immikkoortortaqarfiup ingerlaannarnissaa taamaalilluni qulakkeerneqarpoq, aamma nappaalasoqalissagaluarpat. Umiarsuarni inuttat pisariaqavitsinnagu nunamukaqqusaanngillat, umiarsualivimmilu sulisut umiarsuarnut appakaateqqusaanatik. Nassiussaleriffinni sullissat amerlanerpaamik sisamaanissaat atortipparput. Tamakku – upalungaarsimanermullu attuumassutillit allat – atornerisa saniatigut aamma pisortat siunnersuutaat ilitsersuutaallu malippagut.

Kalaalit Nunaata ingerlaannarnissaa pillugu Royal Arctic Linemi tamavitta sulivugut. Coronamit nappaat arlatta atulissagaluarpagu suliuartarnitsitut sullissinissarput piareersimaffigaarput.