Nanoq Arctica misilerarlugu angalatinneqarpoq
Royal Arctic Linep nunaqarfiliartaataa nutaaq Nanoq Arctica, Tasiilap Islandillu akornanni ingerlaartartussaq, ulluni makkunani misilerarneqarpoq, tassa motoorii atortuilu pingaarutillit tamarmik nakkutigisaasumik ilungersortinneqarput. Tamanna pivoq immami Østersømi, Gdanskip Polenimiittup, Nanoq Arcticap sananeqarfiata, avataani.
Nanoq Arctica immikkut ittumik sikulikkoorsinnaasunngorlugu 35-nillu issittumi angalasinnaasunngorlugu sanaajuvoq, qaammatillu tulliani Royal Arctic Linemut tunniunneqassaaq. Coronamit nappaatip atuunnera qanimut malinnaaffigeqqissaaratsigu Nanoq Arcticap kinguaattooratarsinnaanera sillimaffigaarput. Soorlu Pajuttaat maanna Nuummeeqqilerpoq, ikiuunnissaminut piareersimalluni.
Nanoq Arctica iluaqutigalugu Tasiilaq aasaanerani 50 procentimik tikinneqarnerusassaaq, aamma immakkut assartuinermi attaveqaatinut ilanngutissaaq, ukiup uuma ingerlanerani islandimiut umiarsuaatileqatigiiffiat Eimskip umiarsuarni inissamik avitseqatigalugu Royal Arctic Linep ingerlaaqatigilerpagu.