Malik Arctica pajulluni Nunatsinnut tikippoq

Royal Arctic Linep imarpikkoortaataanut Malik Arcticamut, ullaaq Nuummut tikittumut, Aalborgimiit angalaneq nillerlunilu anorersuarsiorfiusimavoq. Tamatigulli tamaana aamma seqinnarillunilu silagissiorfiusimavoq.

Malik Arctica angalanermi uani silap ajornera pissutigalugu Island avannaqquteriarlugu Tunup sineriaa atuarlugu kujammut ingerlasimavoq.

– Martsip 23-anni ullaaralaakkut Nunap Isua tikipparput, silagissuaarpoq seqerngullu nuinera assut kusanarluni, ullaagissaarnissatsinnik neriusaarisutut ippoq. Akunnerit pingasuinnaat qanngiuttullu suut tamavimmik allanngorluinnarsimapput, maanna 30-35 m/s-nik anorersualerpoq, nittaattorsuuvoq malissuillu portupput, iluliarasaarpoq sikualoqarlunilu. Ualilluinnarnerani anoraaruteqqippoq. Akunnerit 12-it ingerlanerinnaanni ukiumi ilivitsumi silatta allanngortarneri tamaasa misigaagut, umiarsuup naalagaa Høgni Petersen oqaluttuarpoq. Nangipporlu: – Coronavirus atuuppat atuutinngippalluunniit pilersuinitsinni assartugassat isumannaatsumik Kalaallit Nunaannut apuunnissaannik suliassaqarpugut, tamannalu sapinngisarput tamaat naammassiniartarparput.

Høgni Petersen oqaluttuarpoq nunamisulli coronap nappaalatitsinera umiarsuarmi initungaatsiartoq: – Maleruaqqusat uagutsinnut atuuttut malippagut, tuniluuttup umiarsuarmut apuutinnginnissaa Kalaallit Nunaannullu eqqutinnginnissaa Royal Arctic Linep anguniarpaa. Umiarsuarmiinnerup assigiinngissutaa tassaasinnaavoq angalaffitsinni ”mattusimajuartuugatta”, massakkut nunamut tummaqqusaannginnerput inunnullu allanut qanilleqqusaannginnerput allaanerussutaaginnarluni, umiarsuup naalagaa oqarpoq. Malik Arcticami inuttat umiarsuarmiittut katillutik 14-iupput.

Malik Arctica Sisimiunut ingerlaqqissaaq apriilip aallartilaarnerani Aalborgimut uteqqinnginnermini.