Aarhusimut tikinneq siulleq
Ullumi tallimanngornermi juunip 12-iani 2020 umiarsuaatileqatigiiffiup umiarsuaataa nutaanerpaaq Tukuma Arctica siullerpaamik Aarhusimut tikippoq.
Royal Arctic Linep Islandimilu Eimskipip ingerlaaqatigiinnerat pingasunngornermi juunip qulinganni aallartippoq Tukuma Arctica ingerlaaqatigiinneq ammarlugu Aalborgimi usilersorneqarmat, kingornalu Aarhusimut, Reykjavikimut Nuummullu ingerlaassalluni aallarmat.
Eimskipip umiarsuaataata aappaata, Brúarfossip, kinguaattoornera Savalimmiuniulu Torshavnimi umiarsualiviup umiarsuarnik angisuunik tikiffiusinnaanngikkallarnera pissutigalugit ingerlaaqatigiinnerup aallartisarnera marlunnut avinneqarpoq.
Immikkoortumi siullermi nassiussassat aasassallu tamavimmik suli Aalborgikkooqqaartarallassapput, immikkoortorlu siulleq una Royal Arctic Linep Eimskipillu umiarsualivinnik ingerlaarnernillu nutaanik sungiussinissaminnut atorniarpaat.
Aarhusimi nassiussisarfissaq ammassaaq ingerlaaqatigiinneq tamakkiisumik ammarpat, tassalu umiarsuit pingasut siunertamut tassunga sanatinneqarsimasut, Royal Arctic Linep pia Tukuma Arctica Eimskipillu pii Dettifoss aamma Brúarfoss, tamarmik atulerpata, tamannalu oktoberip 28-anni 2020 pissasoq naatsorsuutigineqarpoq.