Nanoq Arctica nunatsinnut ikaarpoq
Royal Arctic Linep umiarsuaataa nutaaneq, Tasiilami eqqaanilu pajuttartussaq siunissamilu Tunumi illoqarfiup taassuma Islandillu akornanni aaliangersimasumik ingerlaartartussaq Nanoq Arctica tallimanngorpat juulip qulinganni atserneqarnissaminut apuunniarluni maanna Aalborgimiit Tasiilap tungaanut ingerlaarpoq.
Nanoq Arctica sikusiorsinnaasutut immikkut ittumik sanaajuvoq 35-nillu issittumut tulluarsagaalluni, aamma 20 fods containerit 108-t usigisinnaavai. Nanoq Arctica marlunnik kivittaateqarpoq, siorlerlu umiarsuup saavaninngaanniit usilersornermut usinginiarnermulluunniit atorneqarsinnaavoq, soorlu Ivalo Arctica aamma Minik Arctica taamatut sulisinneqarsinnaasut.
Nanoq Arcticap Tasiilaq juulip qulingiluaani siullerpaamik tikissavaa, qulinganilu atserneqareeruni aqqarnani Nuummut ingerlaqqissaaq, aallaqqaammut Nuup Nunattalu kujataata akornanni pajuttaatitut atorneqassammat. Umiarsuaq 74 meterisut takitigisoq Tasiilap Islandillu akornanni ingerlaalissaaq Royal Arctic Linep Islandimiumik Eimskipimik ingerlaaqateqarnerata aallartisarnera 2020-mi oktoberip naalernerani tamakkiisumik atulerpat.