Royal Arctic Linep umiarsuaata annersaat umiarsuaatileqatigiiffimmut tunniunneqarpoq

Umiarsuaq containerilersuut TEU-nik 2150-inik usisinnaasoq, Royal Arctic Line A/S-illu imarpikkoortaataata annersaat, Tukuma Arctica, Kinami umiarsualiorfimmit Guangzhou Wenchong Shipyardimit umiarsuaatileqatigiiffimmut ullumi pingasunngornermi januaarip 15-iani tunniunneqarpoq. Royal Arctic Linep taamaalilluni Islandimiut umiarsuaatileqatigiiffiannik Eimskipimik suleqateqarnini aallartissinnaanngorpaa – suleqatigiinneq nunarsuaq tamakkerlugu niuerfinnut ammaassisussaq, sapaatit akunnikkuutaartumillu nunatsinnut aamma attaveqalersitsisussaq.

Ingerlaaqatigiinneq 2020-mi ukiup immikkoortuata aappaani aallarnerneqassaaq, Tukuma Arcticallu ilusilersuisarfimmit Deltamarinimit Finlandimi qitiusumik allaffeqarfeqartumit titartarneqartup, Nuummut siullerpaamik apriilip 17-iani tikinnissaa naatsorsuutigineqarpoq. Tamatuma kingorna Eimskipip Royal Arctic Linellu umiarsuaataat paarlakaallutik ukioq kaajallallugu sapaatit akunnikkuutaartumik nunatsinnut tikittalissapput, Royal Arctic Linellu umiarsuaa aappaluttoq, Tukuma Arctica, Nuummut sapaatit akunneri pingasukkuutaarlugit tikittassaaq. Sapaatit akunnerini allani Eimskipip umiarsuaatai nutaat TEU-nik 2150-inik usisinnaasut, Bruarfoss aamma Dettifoss, Nuummut tikittassapput. 

- Royal Arctic Line taamaalilluni nunatta niueqatigiuminarnerulersinnissaanut piareerluinnalerpoq, Royal Arctic Linemi Fleet Manageri, Anders Bay Larsen, taama oqarpoq. Ilanngullugulu Kinamiut Guangzhoumi umiarsualiorfiata qanittumik suleqatigisimaneranut qujassuteqarpoq, Deltamarinillu ingerlatseqatigiiffiullu nalilersuisarfiup DNVGL-ip, umiarsuarmi atortut suulluunniit pissusissamisut innissaannik qulakkeerinnittussap Royal Arctic Linemit suleqatigineqarsimanerinut aamma qujassuteqarfigai.

Tukuma Arctica umiarsuaatileqatigiiffimmut tunniunneqannginnerani Hongkongip avataani Kinap kujataata imartaani 2019-imi decembarip qaammataani misilerarneqarpoq. Atortullu tamarluinnaasa tyskit ingerlatseqatigiiffiannit Peter Döhle Groupimit misilittarneqarlutillu misissorneqarput. Iluarsisassallu amerlanngitsut eqqaassanngikkaanni misileraalluni angalaneq iluatsilluarpoq.

- Peter Döhle Groupip ilisimasani piginnaasanilu atorlugit ikiuisimaneranut qujassuteqarfigaarput, Anders Bay Larsen oqarpoq.

Tukuma Arcticap angerlamut angalanissaa sivisussaaq, ilaatigut Suez-kanaalikkuussaaq, Akullersuakkoorluni Tuluillu Nunaata Frankrigillu akornanni ikerasakkuussaaq marsillu ingerlanerani Aalborgimut apuutissalluni, tamatumalu kingornalu Aarhusiliassaaq. Tassanilu piareersagassat kingulliit inuttanit isumagineqareerpata nunatsinnut apriilip qulingani aallassaaq.