Royal Arctic Linep sulisoqarnermut pisortaata atorfini qimalerpaa

Tommy Ege Kristensenip, Royal Arctic Linep suliffeqarfissuartut sulisoqarnermut pisortaata, umiarsuaatileqatigiiffik ukiuni arfineq-marlunni suliffigereerlugu maanna qimalerpaa. Aallaqqaammut Tommy Ege Kristensen pisortaqarfiup allattoqarfiani pisortatut, 2016-imiillu sulisoqarnermut pisortatut, ukiorlu kingulleq saniatigut aamma malittarisassat malillugit aqutsinermik nakkutiginnittoqarfimmi (compliance) pisortatut sulisimavoq.

39-nik ukiulik Tommy Ege Kristensen inatsisilerituutut ilinniarsimavoq, nuliaqarluni pingasunillu qitornaqarluni. Ilaqutariit Nuummiiginnassapput, sulisoqarnermummi pisortaq nammineq suliffeqarfiutiminik, inatsisilerinermut sulisoqarnermullu tunngasunik siunnersuisarfiusussamik, ammaaniarpoq.

Tommy Ege Kristensen 2014-imili atorfinippoq, taamaalillunilu suliffeqarfittut pilersaarusiap anguniakkallu ullumikkut piviusunngortitatut atuuttut pinngoqqaarneranniit peqataasimalluni, taakkumi tunngavigalugit umiarsuit imarpikkoortaatit sapaatit akunneri tamaasa massakkut Nuummut tikittarput, taakkulu umiarsualiviit nunarsuarmut attaveqaateqarfillit aqqusaareersimasarpaat, Nunarput niueqatigiuminarnerulersillugu.

Royal Arctic Linep sulisoqarnermut immikkoortortaqarfia (HR, Human Resources) Tommy Ege Kristensenip nalaani allaffimmiit nalinginnaasumiit angusaqarfiulluartumiilli HR-eqarfivinngorpoq, qarasaasiatigut atortorissaarutit atorlugit paasissutissanik tunngaveqarluni atorfinitsitsinernik ilaatigut ingerlatsiviusoq, suliffeqarfiup angusaqarluarsinnaaneranut aamma iluaqutaasoq. Paasissutissat aamma ”eqqoriaanerinnarmik” tunngaveqarani sulisut nutaat sulisooreersullu ineriartornissaannut sulinermi sakkussaalluarput, umiarsuaatileqatigiiffiup iluani immikkoortortaqarfiit akimorlugit sulilernissamut aqqutissiuisinnaallutik.

Royal Arctic Linep Tommy Ege Kristensen sulilluarsimaneranut qujassuteqarfigaa, suliffeqarfiutitaassaatalu ingerlalluarnissaanik kissaallugu: ”Suliffeqarfiup anguniagassaata allanngortinneqarnerani Tommy annertuumik suleqataasimavoq, qularinngilaralu Tommyp misilittagai allanut ilaliullugit iluaqutaassaqisut”, Royal Arctic Linep pisortaanera Verner Hammeken oqarpoq.

”Siunnersuisarfimmik namminersorlunga ingerlatassannik ammaassaanga, pingaarnertut suliffeqarfiit saaffigisinnaasaannik. Isumaqarpunga inatsisilerinerup, sulisoqarnerup suliassanillu piviusunngortitsinerup iluini siunnersorneqarnissamut periarfissaq - akisoorsuunngitsoq - nunaqavissut akornanni amigaataalluinnartoq”, Tommy Ege Kristensen oqarpoq.