Nuummi umiarsualivik ingerlaaqatigiilernissamut piareersimavoq
Islandimi Eimskip Royal Arctic Linep aasaru ingerlaaqatigilerpagu assartukkat 25 procentit missaannik amerlanerit Nuummi, umiarsuit imarpikkoortaatit nutaat pingasut tikittarfissatuaanni, suliarisassanngussapput.
Terminalimi sulisut 50-ngajaat allaffimmiullu 8-t, suleqatigiinnut marlunnut avissimasut umiarsuillu imaarneqarnissaannik usilersorneqarnissaannillu akisussaasuusut, ingerlaaqatigiilernermi allatulaaq suleriaaseqalissapput. Ullumikkut nalinginnaasumik umiarsuaq ataaseq suliarisarpaat siunissamili imarpikkoortaat pajuttaallu ataaseq ataatsikkut suliarisalissavaat – pajuttaatit tassaapput nunatta avannaanut kujataanullu pajuttuisartut.
Taamatut sulilernermi Nuup umiarsualiveqarfiani Qeqertani 305 meterisut takitigisumi pajuttaatit paarlaattarlutik imarpikkoortaallu suliarineqartassapput. Siullermik imarpikkoortaat pajuttaallu avannamukartussaq kingornalu imarpikkoortaat pajuttaallu kujammukartussaq.
Imarpikkoortaatit, taallimanngornerit tamaasa ullaakkut tikittartussatut pilersaarutaasut, umiarsualiviup kraaniinik angallattakkanik marlunnik - aappaa kallerup innermoortoq – atorluni sullinneqartassapput, pajuttaatillu namminneq kraanii atorlugit.
– Sulisutta saniatigut umiarsualivimmi sulisussanik 12-inik ilasariaqarsimavugut umiarsuit nutaat usillu amerlanerit suliarisinnaaniassagatsigit, aamma sungiusarsimavugut aallartilivinnginnitsinnullu piareersimaniarluta qaammatini tulliuttuni workshopertitsissalluta. Suleriaatsit nutaat ilitsersuutigineranni sungiusarneq sulianillu sungiussisitsinissaq aqqutaapput, immikkoortortaqarfimmi Nuummi umiarsualivinnut pisortaq Daniel Danielsen, Royal Arctic Line oqarpoq.
Ulluni makkunani Nuummi, COVID-19’p nappaalatitsinissaanut ernumanartorsiorfiusumi, umiarsualivimmi sulisut suleqatigiiaatut avissaarsimatinneqarput, imminnut naapinnatillu takoqqusaanngillat – aamma suliffiup avataani.
Kalaallit Nunaata pilersorneqarnera pillugu pisussaaffipput Royal Arctic Linep sunit tamanit pingaarnerutittarpaa – aamma ulluni makkunani.
