Tunumi umiarsuaqarnerup pitsaanerulersinnissaa Royal Arctic Linep misissorpaa

Tasiilami innuttaasut atsiornernik katersaat 434-t Royal Arctic Linemut novembarip aallaqqaataani 2019-imi tunniunneqarput. Royal Arctic Linep umiarsuaata ukiunnginnerani sikunnginneranilu akulikinnerusumik kingusinnerusukkullu tikittalernissaat innuttaasut kissaatigaat.

Innuttaasut uatsinnut toqqaannartumik saaffiginninnerat Royal Arctic Linemi nuannaarutigaarput, Tasiilap nunaqarfiisalu pilersorneqarnerinut periarfissaasinnaasut taamaalilluta oqaloqatigiissutigisinnaagatsigit.

Ullumikkutut isikkoqartillugu, Tasiilaq Royal Arctic Linep umiarsuaanit ukiumut quleriarlugu tikinneqartarpoq. Umiarsuaq siulleq Tasiilap avataani sikorsuit juunip aallartinnerani aqqutigineqarsinnaaleraangata tikikkajuttarpoq, tamatumalu kingorna Tasiilaq umiarsuarmit umiarsualivianut pulasinnaasumit sapaatit akunneri pingasukkuutaarlugit tikinneqartarluni. Umiarsuarlu kingulleq nalinginnaasumik novembarip qiteqqunnerani tikittarpoq, tamatumalu kingorna sikorsuaqalersarluni.

Piumaneqarnera atsiornernillu katersisoqarnera tunngavigalugit umiarsuarmik ataatsimik aqqusaaqqittoqarnissaanut ukioq manna periarfissaqarnersoq soorunami misissorparput.

Umiarsuarmulli angalatissinnaasatsinnut Pilersuisoq nassiussassanik pissarsisinnaasimanngilaq, umiarsuup angalatissinnaasatta ullormi aallarfissaanut piareersinnaasimannginnami.

Royal Arctic Linep nutaanik umiarsuartaarluni, Islandimiullu umiarsuaatileqatigiiffiat Eimskip suleqatigalugu, Kitaani assartuusseriaatsiminik allanngortiterinera ilutigalugu, Tunumut umiarsuaqartarnerata pitsaanerulersinnissaanut periarfissat assigiinngitsut misissorpai. Assersuutigalugulu aaqqiissutaasinnaasut ilagaat Islandimut toqqaannartumik attaveqalernera, sikuunnginnerani akulikinnerusumik umiarsuaqartalerluni. Taamatut allanngortitsisoqarneratigut Tasiilap siusinnerusukkut kingusinnerusukkullu tikinneqarsinnaaneranut eqaannerulersitsissaaq, sikuunera silalu apeqqutaatillugit. Nutaanik suliniutivut qaammatit tulliit marlussuit ingerlanerini sukumiinerusumik paasissutissiissutigisinnaassallugit neriuutigaarput.

Paasisaqarnerorusukkaanni apeqqutissaqaanniluunniit attavigineqarsinnaavoq:

Lars Borris Pedersen, CCO, Royal Arctic Line A/S.

Email: LBP@ral.gl Oqarasuaatikkut toqqaannartumik: +299 349 111