Kalaallit Nunaata ajornannginnerusumik niueqatigisinnaanngornissaanut Royal Arctic Line pingaartumik alloriarpoq

Royal Arctic Linep imarpikkoortaatissaa nutaaq sisamanngornermi 28. Marts 2019 singinneqarpoq, umiarsuarlu maanna septemberip tungaanut inaarsarlugu suliarineqassaaq. Umiarsuaq Nuka Arctica-miit 50 meteringajannik takineruvoq, containerinillu 2.150-inik useqarsinnaalluni, Nuka Arctica 782-inik useqarsinnaasoq. Eimskip-imik suleqateqarluta ingerlaaqatigiittalernissatsinnut umiarsuup taassuma naammassinissaa pingaarutilerujussuuvoq.

Ingerlaaqatigiittalernissaq isumaqarpoq ukioq kaajallallugu sapaatip akunneri tamavimmik ingerlaarfiussasut, aamma umiarsualivinnut nutaanut, soorlu Reykjavikimut, Torshavnimut Aarhusimullu. USA/Canadamut/-miillu Islandimullu/-miillu attaveqaatit pitsaanerit atulissapput. Kalaallit Nunaanni avammut nioqqutissiortunut iluaqutaasumik Asia-mut, Europamut nunarsuullu sinneranut attaveqaatit pitsaanerulissapput. Sapaatip akunneri tamaasa. Ukioq kaajallallugu.

Taamatut pitsanngorsaanerup akinik aalajangersaalluni suleriaatsimut annertuumik sunniuteqarnissaa pilersaarutaanngilaq. Aamma nassiussassanik sullissinerup allannguuteqarnissaa pilersaarutaanngilaq. Nutarterinerilli siunissami niueqatigiinnermut eqeersimaarnerusumut tunngaviusinnaapput. Sullitatsinnut tamanut Kalaallit Nunaatalu niueqatigisartagaanut iluaqutaasumik.

Alloriarnissaq pingaartoq tulleq tassaavoq Islandimi unammilleqatigiinnermut qullersaqarfiup (ICA-p) akuersinissaa, qanittukkullu aalajangertoqarnissaa naatsorsuutigaarput. Tungaanut 2019-ip naanerata missaani ingerlaaqatigiittalernissamut piareersaatit suli ingerlanneqarput.

Kiffartuussissutsit ataasiakkaat eqqarsaatigalugit aallaavittut sullitatsinnik sullisseriaatsip annertunerusumik allannguiffiginissaa ilimaginngilarput, ammanerusumilli ingerlaartalernissami periarfissat amerlanerulissapput, tamakkulu sullitatta piffissap ingerlanerani iluaqutigisinnaassavaat. ICA-p aalajangernera tusaannavillutigulu periarfissat tamakku suunerinik sullitatsinnut paasissutissiissalluta piareersimassaagut, aamma paasissutissiilluni ataatsimiitsitsinikkut.