Nassiussanik sillimmasiineq

Royal Arctic Linep nassiussanik sillimmasiinissaq sakkortuumik kaammattuutigaa – assartuussisartut ajoqusiinernut killilimmik akisussaaffeqartarmata. Apeqqutit akissutillu, assartuinermut aalajangersakkat ataanni, imaluunniit kiffartuussivik attaveqarfigalugu paasisaqarnerusinnaavutit.

Sillimmasiissaguma qanoq iliussaanga?
Sillimmasiineq Royal Arctic Linemi pisinnaavoq. Gjensidige Royal Arctic Linemut sillimmasiinernik pilersuisuuvoq.
 
Nassiussassamik inniminniinermi Royal Arctic Line aqqutigalugu sillimmaserusunnerlutik paasissutissiissutigissavat. Sillimmaserusukkuit tamanna nassiussat allagartaannut ilanngunneqassaaq akiligassiissutikkullu akilerneqarluni.

Uani Sillimmasiinermut akiliutit annertussusaat PDF fiilinngorlugu aaguk

Nassiussanik ajoqusersoqartillugu
Nassiussat tigunerini ajoqusersimanerat takuneqarsinnaappat, tamanna tunniussinermut uppernarsaammut allanneqassaaq. Nassiussat ajoqusersimanerat angerlaatereernerini aatsaat paasineqarpat ajoqusiinermi nalunaarusiaq immersussavat – taanna uani nassaarisinnaavat. Ajoqusiinermi nalunaarusiap, umiartorneq pillugu inatsit naapertorlugu, nassiussat tunniunneqarnerinit kingusinnerpaamik ullut pingasut qaangiutsinnagit nassiunneqareersimanissaa eqqumaffigineqassaaq.