Nunarput siunissamut piujuartitsiffiusumut atassuserusupparput

Periusissiaq

Royal Arctic Linep piujuartitsineq pillugu periusissiaa ESG tunngavigalugu periusissiornikkut tunngavissanik pingasunik tunngaveqarpoq.

Silap pissusianut avatangiisinullu sunniuteqarnermut erseqqissumik akisussaaffeqarneq pingaarnertut suliaqarfigisatta ingerlanneqarnerata sunniutaata ilisimaarinissaanut akisussaaffiginissaanullu tunngassuteqarpoq. Teknologiit nutaat avatangiisitigut sunniutaasunik annikillisaasinnaasut pillugit ilisimasanik ingerlatseqatigiiffik paasisimannilluassaaq. Tamatuma malitsigisaanik siunissami atortunut mingutsitsinnginnerusunut aningaasaliisoqassaaq, gassinik silaannarmik kissatsikkiartortitsisunik aniatitsinerup annikillisarneqarnissaa siunissarlu ungasinnerusoq eqqarsaatigalugu avatangiisinut sunniutaasut annikinnerulersinnissaat siunertaralugu. Piffissami periusissiap atuuffigisaani matumani silap pissusianut nammakkiutaasunut naatsorsuutinik suliaqartoqassaaq ukiumullu tunngavigineqartumut naatsorsuinissaq salliutinneqassalluni. Siunissamullu suliniutissagut tutsuiginartumik ikorfartussavagut tassungalu ilanngullugu Science Based Targetimi tunngavissanut ilanngutissalluta. Taamatuttaarlu pisariillisaanissaq pitsanngorsaanissarlu ukkatarineqassapput, pitsaassuseq eqqortoq atorlugu sullitatsinnut peqatigisatsinnullu assigiinngitsunut tunniussassatut neriorsuutigisatsinnik tunniussaqarsinnaajumalluta.

Inummut tamarmiusumut akisussaaffeqarneq inuiaqatigiit kalaallit ineriartortinneqarnerini Royal Arctic Linep pingaaruteqarluartumik inissisimasinnaaneranit aallaaveqarpoq, innuttaasut ilinniagaqarnissamut suliffeqarnissamullu periarfissaannik eqeersimaartumik ikorfartuinikkut - taamatuttaarlu ilaqutariinnik nukittorsaanikkut, sulisunut suliatigut inuttullu siuariartornissamut periarfissaqartitsisumik suliffeqarfimmik toqqissisimanartumik pitsaasumillu neqerooruteqarnikkut. Pitsaasumik inuuneqarnissaq, tamat atugarissaarfigisaat qanorlu suiaassuseqarneq tunuliaqutaqarnerlu apeqqutaatinnagit assigiinnik periarfissaqarfigisaat ingerlatseqatigiiffiup peqataaffigerusuppaa.
Royal Arctic Linep inunnik ataasiakkaanik siuarsaarusuppoq, suliffeqarnermi eqeersimaartumik peqataasinnaaqqullugit peqqinnartumik pitsaasumillu inuiaqatigiinnut tamanut iluaqutaasumik.

Akisussaassusilimmik aqutsineq suliffeqarfimmut pitsaasumut toqqissisimanartumullu sinaakkutissanik pilersitsinissamut tunngavoq, ammasumik ingerlatsineq tutsuiginassuserlu pingaarnertut tunngavigalugit. Tamanut pitsaasumik sunniuteqarluartumillu attaveqaqateqarnissap qulakkeerneqarnissaa suliffeqarfimmillu pitsaasumik aqutsineq malittarisassanillu malitsitsinermik toqqammaveqartumik ingerlatsinissaq pingaarluinnartuuvoq. Ingerlatseqatigiiffiup piffissami periusissiap atuuffigisaani sulissutigisaani tamani tamakku toqqammavigineqassapput, ingerlatseqatigiiffiullu anguniagaa suli tassaavoq nunat tamalaat akornanni nallersuunneqarsinnaasumik inissisimanissaq, aamma piumasaqaataasut amerliartornerat qaffasinnerulernerallu ilutigalugu. Ingerlatseqatigiiffiup ”Isumannaallisaanermut avatangiisinillu illersuinermut politikkianut” naapertuuttumik nunami namminermi kiisalu nunani tamalaani inatsisit malittarisassallu atuuttut unioqqutinneqassanngillat, pilersuinerup isumaannaassusia akigineqassanngilaq kiisalu ingerlatseqatigiiffiup pingaartitatut aalajangersagai unioqqutinneqassanatik.

Piujuartitsineq pillugu illu
Piujuartitsineq pillugu illu tassaavoq piujuartitsineq pillugu periusissiap takusassianngortinnera. Tassani anguniagaq, siunertaq, pilersaarusiornikkut tunngavissat sammisallu qitiusut nassuiarneqarput. Qiutillugit sammisassat suliffeqarfiup periusissiaani sammisat pingasut assigaat anguniakkallu tamarmik qitiusumik sammisassanut pilersaarusiornikkullu tunngavissanut qulaani taaneqartunut sammisuullutik. Piujuartitsineq pillugu illu piujuartitsineq pillugu pilersaarummik ilaqartinneqassaaq, tassanilu KPI-t iliuutsillu tigussaasut ESG-mi kisitsisit pingaarnerit atorlugit nassuiarneqassapput atulersitsinissaq ingerlatsinissarlu qulakkeerniarlugit. Nunani tamalaani sinaakkusiussat ingerlatseqatigiiffimmut ikorfartuisuupput, datanik tutsuiginartunik sanillersuunneqarsinnaasunillu suliaqarnissamut eqqortumillu nalunaaruteqartarnissamut.

Periusissiamik suliaqarnerup taamaalilluni imarai - Piujuartitsineq pillugu periusissiamut illu, piujuartitsineq pillugu pilersaarut aamma nalunaaruteqartarnermut tunngavissat. 

	Piujuartitsineq pillugu illu ugguuna aaneqarsinnavoq.