Atorfeqarneq

Royal Arctic Linep nuna tamakkerlugu pilersuinermik qulakkeerinnittussatut inuiaqatigiinnut kalaallinut pingaaruteqarluinnartuunera akisussaaffiliivoq. ”Nunatta niueqatigiuminartunngortinnissaa” anguniarparput, nunarpullu pilersuinnarnagu siuarsaaqataaffigilissavarput. Sullitatta sullinneqarnerat pitsaanerulersissavarput, aamma nunarsuarmi immitsinnut qanilligaluttuinnarfigisatsinni periarfissallu amerliartuinnarfigisaanni allanngortissinnaanerput pitsaanerulersissavarput.

Nunatta niueqatigiuminarnerulersinnissaanik takorluukkatta angunissaanut Royal Arctic Linemi sulisut tamarmik suleqataapput.

Royal Arctic Linemi atorfeqarnikkut qaffassarnissamut periarfissat assigiinngitsorpassuupput. Taamaammat ineriartornikkut atorfeqarnikkullu qaffassarnissamut tapersersuinissaq pingaartipparput. Periarfissat, sulisut ineriartornissamik kissaataannut immikkut ittunut sulisunillu aalajangersimasunik piginnaasalinnik pisariaqartitsinitsinnik ataqatigiissitsisinnaasunik siunnerfilimmik suliniuteqarpugut.

Ineriartornissamut suliffeqarnikkullu qaffassarnissamut periarfissat assigiinngitsut immikkut samminerisigut, sulisoreriikkat sulisoriinnarnissaat pisariaqartitatsinnillu sulisussarsinissaq qulakkeersinnaavarput.

Tamatuma saniatigut siunissami aqutsisussanik nunatsinnilu imarsiornerup iluani nunani tamalaani immikkut ilisimasalinnik ilinniartitsinissaq aamma anguniagaraarput.

Taamaammat suliffeqarfitsinni unammilligassaqarluarlutit atorfeqarnikkut siuarsarsinnaavutit. Suliffeqarfitsinni sulileruit, pikkorissunik, tunniusimasunik tatiginartunilu suleqatitaassaatit, ineriartornissannut periarfissaqarlutit – suliatigut inuttullu – Royal Arctic Linellu anguniagaa toraarlugu ingerlaaqatigiissaagut.

Siunissamilu anguniakkatta angunissaanut sapinngisarput tamaat sulinissarput immitsinnullu naatsorsuutigisatta naleqqussarnissaat pingaartuuvoq.