Inuiaqatigiinni ingerlatat appasinnerunerat Royal Arctic Linep niuerneranut sunniuteqarpoq

Royal Arctic Line A/S inuiaqatigiinni kalaallini ingerlatanut nalinginnaasunut qanimut atassuteqarpoq. Sanaartornermillu aamma illuliortiternermik suliniutit annertunerusut arlallit naammassinerisa kingorna aalisarnerullu iluani ingerlatat apparnerisa sunniutaat, ingerlatseqatigiiffiup assartortagaata annertussusaatigut aningaasatigullu isertitaatigut maanna erseqqissumik malugineqarsinnaavoq. Taamaattumik 2025-mi ukiup affaa siulleq inuiaqatigiinni ingerlatat appasinnerunerannit sunnigaavoq niuernermut malunniuteqartumik.

Royal Arctic Line A/S-ip 2025-mi ukiup affaani siullermi assartugai tamarmiusut siorna piffissap taamaalineranut naleqqiullugit 6 %-it missaannik appariaateqarput. Appariaateqarnermut pissutaanerpaapput sanaartornermut illuliortitsinermullu suliaqarfimmut assartukkat ukiuni arlalinni qaffasissupilussuusinnarlutik maanna nalinginnaasumut inississimanerat kiisalu aalisarnermi pisat – ingammik nunatsinnit avammut assartukkanut tunngatillugu qitiusut - kinguariarfiusimanerat. Tamatuma saniatigut poortuutissanik ingerlaartitsisarnerit allanngornerat utertitassanik assartuisarnerup kinguariarfiuneranik kinguneqarpoq, tamannalu nunap iluani assartukkat annertussusaannut kinguariarfiusumik sunniuteqaqqilluni.

Suliffeqarfissuup 2025-mi ukiup affaani siullermi isertitai tamarmiusut DKK 30 millioninik kinguariarput, 7 %-it assigalugit, aningaasartuutillu assartuinermut tunngasut, 2024-mut naleqqiullugit, DKK 10 millioninik ikilisinneqarlutik. Assartukkat kaaviiaartitallu kinguariarfiugaluartut ingerlatsinermi angusat (EBITDA) pitsaanerulersinneqarput 2025-milu ukiup affaani siullermi DKK 7 millioniullutik – siorna piffissap taamaalineranut naleqqiullugit DKK 11 millioninik siuariarnerulluni. Ineriartorneq tamanna niuerfimmi ingerlatat appasissumiiffigisaanni sunniuteqarluartumik aningaasartuutinik aqutsisoqarneranik takutitsivoq.

Ineriartornerup malitsigisaanik 2025-mut naatsorsuutit naleqqussarneqarput. Nunatsinnut assartukkat nunallu iluani assartukkat 5 %-inik apparnissaat maanna naatsorsuutigineqarpoq missingersuutaaqqaartunut naleqqiullugu. Kisermaassiviusumi assartukkanut kaaviiaartitat missingersuutigineqartut DKK 35-40 millionit ataallugit angusaqarfiunissaat naatsorsuutigineqarpoq.

Arctic Umiaq Line A/S
Ingerlatseqatigiiffiutigisap Arctic Umiaq Line A/S-ip periusissiani 2024-miilli naleqqussarpaa, umiarsuarlu ilaasartaat Sarfaq Ittuk siornatigut angalanermut pilersaarutigisarsimasani malillugu maanna angalaqqilerpoq. Ingerlanneqarneratalu ingerlatiinnarnissaa tapersersorniarlugu Naalakkersuisut ingerlatseqatigiiffimmut amigartooruteqarnissamut qularnaveeqqusiisimapput.

2025-mut angusat
Royal Arctic Line A/S-ip 2025 tamaat isigalugu akileraarutit sioqqullugit DKK 1–10 millionit akornanni angusaqarnissani naatsorsuutigaa.

Paasissutissat sukumiinerusut pillugit attaveqarfissaq: Jørgen Aqe Møller, Aningaasaqarnermut pisortaq, jaqm@ral.gl