Royal Arctic Line pitsanngorsaavoq
Royal Arctic Line pitsanngorsaavoq siunissamilu aningaasaliinissamut piareersarluni
Aningaasaqarnikkut angusat takutippaat 2023-mi akileraarutit suli ilanngaatiginagit DKK 96 millioninik amigartooruteqarneq akileraarutit suli ilanngaatiginagit DKK 4 millioninik sinneqartooruteqarnermut saatsinneqartoq. Tamanna iliuutsitsigut akigititanillu qaffaanikkut assigiissumik qulakkeerneqarpoq.
Kisermaassiviunngitsumi aningaasarsiornikkut iluanaarutit siuariartorfiunerisigut 2022-mut sanilliullugu 2023-mi DKK 16 millioninik iluanaaruteqarnerunissaq qulakkeerneqarpoq. Tamannalu kisermaassiviusumi nassiussanut tunngatillugu Nunatsinnut, nunatsinnit nunattalu iluani assartuinermut akigititanik qaffaanissat killilersimaarnissaannut qulakkeerinneqataavoq.
Assartukkat annertussusiisa 2024-mi siuariartorfiunnginnissaat naatsorsuutigineqarpoq, ilaatigut Nuummi mittarfissuup sanaartorneqarnerata 2024-mi naammassineqartussaanera pissutigalugu. Angalanermut pilersaarutip nutaap, umiarsuup imarpikkoortaatip Nuummut siusinnerusukkut tikittalerneranik imaqartup malitsigisaanik kisermaassiuviunngitsumi aningaasatigut isertitat appariartornissaat aamma naatsorsuutigineqarpoq.
Aningaasartuutit appartinniarlugit ingerlatseqatigiiffiullu sullitaanik pitsaanerusumik kiffartuussinissaq siunertaralugu ingerlatseqatigiiffiup iluani suleriaatsinik ingerlaavartumik pitsanngorsaasoqassaaq pisariillisaasoqarlunilu, ilaatigut digitalinngortitsinerunikkut AI-llu atorluarneqarneruneratigut. Tamatuma malitsigisaanik aamma pigisat ingerlatsinermut pingaarnerusumut iluaqutaanissaat qulakkeerniarlugu ingerlaavartumik ukkatarinnittoqassaaq. Immikkoortullu ingerlatseqatigiiffiup ingerlatsineranut pingaarnerusumut iluaqutigineqanngitsut ingerlaavartumik tuniniarneqassapput.
Umiarsuarnut nutaanut aningaasalersuinissanut tullinnguuttunut piareersaatit siulliit aallartereerput, 2028-miillu aningaasalersuinissamik pisariaqartitsineq annertussaaq, maannalu akiitsunik akilersuineq peqatigalugu ingerlatseqatigiiffiup aningaasaqarneranut annertuumik piumasaqaateqassalluni, taamaattumillu akigititanut tunngatillugu ineriartortitsineq pillugu ukiuni arlalinni atuuttussamik piginnittunut isumaqatigiissuteqartoqarpoq.
2024-mi akileraarutit suli ilanngaatiginagit DKK 0 million aamma DKK 10 millionit akornanni sinneqartooruteqarnissaq ingerlatseqatigiiffiup pisortaqatigiivisa naatsorsuutigaat.
Paasissutissat sukumiinerusut pisortaanermut Niels Clemensenimut saaffiginnissuteqarnikkut pissarsiarineqarsinnaapput
Tlf: 553652
Email: nic@ral.gl
Ukiumoortumik nalunaarusiaq 2023 uani atuarneqarsinnaavoq:
ukiumoortumik-nalunaarusiaq-2023_web.pdf (ral.gl)