Pisortaaneq Verner Hammeken Royal Arctic Linemit tunuarpoq

Verner Hammekenip umiarsuaatileqatigiiffiup Namminersorlutik Oqartussanit pigineqartup annertuumik allanngortiteriffigineqarnera ukiuni kingullerni arfineq pingasuni siuttuuffigaa. Piffissami pineqartumi umiarsuaatinik nutarterineq annertooq ingerlanneqarpoq, aaqqissuussaaneq ingerlatsinerlu Nuummi katersorneqarput, Nuummi umiarsualivik nutaaq atorneqalerpoq, Eimskipimik ingerlaaqateqarneq pilersinneqarpoq, Danmarkimi ingerlatat Århusimut nuunneqarput aammalu systemitigut aaqqissuussaanikkullu annertuunik nutarterisoqarluni.

Maannalu ulluinnarni aqutsinerup aaqqissuussaanerup immikkoortuini tamani peqqissaartumik atassuserneqarnissaanut aqutsinikkut piginnaasanik nutaanik pisariaqartitsisoqalerpoq taamaattumillu siulersuisut Verner Hammeken isumaqatigiissuteqarfigaat Royal Arctic Line-imi pisortaanertut tunuassasoq tamatumunngalu peqatigitillugu Royal Arctic Line-imi pisortaanermik nutaamik pissarsiornissamut suliaq aallartinneqassalluni. Royal Arctic Line-imi tuniniaanermut pisortaq Niels Clemmensen atorfinitsitsisoqarnissaata tungaanut pisortaanerugallartussatut atorfinitsinneqassaaq. Verner Hammeken piffissami ikaarsaarfiusumi ingerlatseqatigiiffimmut ikiuutissaaq.

Verner Hammekenip Royal Arctic Line-ip ukiut arfineq pingasut ingerlanerini siuttuuffiginerani annertuumik suliaqarsimaneranut allanngortiterisimaneranullu siulersuisut qujassuteqarfigaat.

Paasissutissat sukumiinerusut ingerlatseqatigiiffiup siulersuisuisa siulittaasuannut Pâviâraq Heilmannimut saaffiginnissuteqarnikkut pissarsiarineqarsinnaapput.
Tlf: 538763
Email: paviaraq@hotmail.com