Sikorsuaqarnera Kujataani pilersuinermut akornusersuivoq

Kujataani ukioq manna siusinnerusukkut sikorsuaqarnera Royal Arctic Linep umiarsuaataanut Nanoq Arcticamut aamma Tilioq Arcticamut annertuumik akornusersuivoq. Nanoq Arcticap Qaqortumit Nanortalimmut angalanera kingulleq nalunaaquttap akunnerinik 14-inik sivisussuseqarpoq nalinginnaasumik nalunaaquttap akunnerinik arfinilinnik sivisussuseqartaraluarluni.

Kujataani illoqarfinnut aqqusaarnerit tamarmik kinguaattoorfiunissaat maanna naatsorsuutigineqarpoq, aamma Qaqortup kujataani nunaqarfiit maannakkorpiaq tikinneqarsinnaanngikkallarput, sikorsuaqarnera pissutigalugu.

Royal Arctic Linep Nanoq Arcticamut taarsiullugu Maleraq Arctica Nuup Paamiullu akornanni assartuitippaa taamaalillunilu Kujataani sikusiornissamut piffissaqarnerussalluni.

Nanoq Arcticami Tilioq Arcticamilu inuttat qasusuillutik sulipput sapinngisartillu tamaat atorlugu usit apuuffissaannut tamanut apuunniarsaralugit, aamma Tilioq Arctica sapaatit akunnerata naanerani sikorsuit pissutigalugit iluatsitsinngitsoornermi kingorna Arsummut maannakkorpiaq misileeqqippoq.

Sikorsuaqarnerata allannguuteqarnissaannut sakkortuumik anorlernissaa pisariaqarpoq, ajoraluartumillu Kujataani maannakkorpiaq anoreqanngilaq.

Sikorsuaqarnera Sarfaq Ittuup angalanermut pilersaarutaanut aamma sunniuteqarpoq. Sarfaq Ittuk pilersaarutit malillugit ullumi pingasunngornermi nal. 16:00 Qaqortumut tikittussaagaluarpoq, aatsaalli nal. 18:00 tikissangatinneqarluni. Sarfaq Ittuup pilersaarutit malillugit Qaqortumit nal. 19:00 aallarnissaa naatsorsuutigineqarpoq.