ETS pillugu ilisimatitsineq
EU-p Emissions Trading Systemia (ETS) januaarip aallaqqaataani 2024-mi atuutilersinneqartussaq ataani paasissutissiissutigineqarpoq.
ETS-ip januaarip aallaqqaataa 2024 aallarnerfigalugu EU-mit EU-mullu kiisalu Islandimit Islandimut, EØS-imut ilaasortaasumut, imaatigut assartuussinermut atuuttussanngortinneqassasoq EU-mit aalajangerneqarpoq.
Tamatuma kingunerisaanik EU-mit kiisalu nunanit EØS-imut ilaasortaasunit Nunatsinnut paarlattuanillu nassiussanut tamanut atuuttumik CO2-mut akitsuummik akiliisoqartalissaaq. Tamannalu Imarpikkut nassiussanik assartuinermut sunniuteqassaaq.
ETS suua?
ETS tassaavoq CO2-mut akitsuut EU-mit eqqunneqartoq, umiarsuaatileqatigiiffiit CO2-mik annikinnerusumik aniatitsisalernissaannut kajumilersinnissaannik siunertaqartoq. ETS suliffissuaqarnerup nukissiuutinik annertuumik atuiffiusup kiisalu nukissiuuteqarnikkut suliaqarfiup iluanni ilisimaneqareerpoq, januaarillu aallaqqaataa 2024 aallarnerfigalugu aamma imaatigut assartuinermut atuuttussanngussalluni.
ETS-ip siunertaa tassaavoq CO2-mik aniatitsinerup qummut killeqartinnissaa, CO2-millu aniatitsisinnaanermut akuersissutit aalajangersimasumik amerlassusillit atulersinneqarput, taakkulu niuerfimmi ammasumi niuerutigineqartassallutik. CO2-p nammineerluni aniatitap matussusernissaanut ETS aqqutigalugu EU Allowancesinik (EUA) pisisoqartassaaq, qanorlu annertutigisumik atuisoqartigineranik naatsorsuereernermi CO2-mut aniatitamut akiliutitut utertitsisoqartassalluni.
Royal Arctic Line taamaalilluni CO2-mik aniatitsisinnaanermut akuersissutinik – EUA-nik pisiortortalissaaq EU-mut EU-miillu nassiussanik assartuinermini CO2-mik aniatitsisinnaanissaminut atatillugu.
ETS qanoq akeqarpa?
CO2 tonsi ataaseq 2023-mi 100 €-it missaannik akeqarpoq. EUA-mut akuersissutit niuerfimmi killilersugaanngitsumi niuerutigineqartarput akialu tuniniakkat pisiaasartullu najoqqutaralugit aalajangerneqartarluni. 2024-mi qanoq akeqassanersoq siumut oqaatigineqarsinnaanngilaq, akuersissutit niuerfimmi killilersugaanngitsumi niuerutigineqartarmata.
Akigitinneqartoq Royal Arctic Linemi BAFCAF-itulli naatsorsorneqarlunilu akilerneqartassaaq. Akiliutissaq januaarip aallaqqaataanit 1%-imut inissinneqassaaq BAFCAF-ilu assigalugu ingerlaavartumik qaammatit tamaasa naleqqussarneqartassalluni.
CO2-mut akitsuut aqqutigalugu aningaasat akiligassanngortinneqartut sumut ingerlatinneqartassappat?
CO2-mut akitsuut EU-mut akilerneqassaaq, taamaattumillu akitsuut akilerneqartoq Royal Arctic Linemut akiliutaanngilaq. Akitsuummut attuumassuteqartumik isertitat EUA-mik akuersissutit niuerutigineqarnerat aqqutigalugu Royal Arctic Linemit ingerlateqqinneqassapput.
Sooq tamanna Royal Arctic Linemut sullitaanullu sunniuteqassava?
Akitsuut EU-mut EU-miillu kiisalu nunanit EØS-imut ilaasortaasunut nassiussanut tamanut atuuppoq. Royal Arctic Linelu Imarpikkoortaatit atorlugit EU-mut EU-miillu nassiussanik assartuisarpoq, eqqussukkanut avammullu nioqqutinut tunngatillugu.
Akitsuut qanoq iliorluni akiligassanngortinneqassava?
Akitsuut BAFCAF-itulli naatsorsorneqarlunilu naleqqussarneqartassaaq. Akitsuut Royal Arctic Linemit akiligassiissummi titarnermi immikkoortumi allaqqassaaq. Taamaattumillu aningaasartuutigisanit EU-mut akiliutissat qanoq annertutiginersut akiligassiissummi takuneqarsinnaassapput.
Nunatsinnut nunatsinniillu nassiussanut akitsuutip annikillisarnissaanut Royal Arctic Line qanoq iliuuseqarpa?
Imarpikkut angalanermut pilersaarummut allannguutaasut umiarsuit imarpikkut kigaannerusumik ingerlaarnissaannut periarfissaqalersitsipput, tamannalu orsussamik atuinikinnerulernissamik kinguneqassangatinneqarluni.
Umiarsuaatileqatigiiffiup umiarsuaataanik ingerlaavartumik nutarterinermut atatillugu teknologiinik nukissiuutitigut ileqqaarutaasunik nutaanik atuisoqalersinnaanissaa naatsorsuutigineqarpoq.
ETS-imut tunngatillugu apeqqutissaqartoqassappat taakku Royal Arctic Linep sullitanik kiffartuussivianut ingerlateqquneqarput.