Royal Arctic Linep nassiussalerinermi ingerlatsineq allamut tunivaa
Maajip aallaqqaataaniit Royal Arctic Linep Nunatsinni nassiussalerinermi ingerlatsinermut immikkoortortaq pigiunnaassavaa.
Royal Arctic Linemi ingerlatsinermi pitsanngorsaanermut pisariillisaanermullu atatillugu pisortaqatigiit aalajangersimavaat ingerlatseqatigiiffiup nassiussalerinermi ingerlatsinera Nunatsinnilu umiarsualivinni akuersissutitalinnik suliaqarfissani ingerlatsineq Eimskip Greenlandimit akisussaaffigineqalissasoq. Nassiussalerinermi ingerlatsinermi nalinginnaasumik immakkut silaannakkullu assartugassat isumagineqartarput, assartugassat nassiunneqannginnerini apuuffissaannullu apuunnerisa kingorna isumagisassartaannik isumaginninneq isumagineqartarpoq minnerunngitsumillu Nunatsinni umiarsualivinni assartukkat pappiarartaasa ajunngitsumik isumagineqarnissaannik qulakkeerinnittoqartarluni. 1995-imiilli immikkoortortaqarfimmit isumagisassat tamakkua tamaasa Nunatsinni Nunattalu avataani sullitatsinnut suliarineqartarsimapput.
Royal Arctic Linep qitiusumik suliassaa tassaavoq assartugassat Nunatsinnukartut, Nunatsinniit avammukartut Nunattalu iluani assartugassat pitsaanerpaamik isumagissallugit. Umiarsuit ingerlaarfigisartagaannik pitsanngorsaaneq ukkatarereerlugu nutaamillu umiarsuartaarnissamut aningaasaleereernitta kingorna piffissanngorsimavoq suliat sorliit piginnittutsinnit Namminersorlutik Oqartussanit qitiusumik suliakkiunneqarsimasunut tapersiinersut qimerluussallugit.
”Nammineerlunga Royal Arctic Linemi nassiussalerineq 1995-imi DFDS peqatigalugu aallartitseqataaffigaara. Ullumikkut killiffik eqqarsaatigalugu uannut pingaaruteqarsimavoq nassiussalerinermi suliassat avatangiisini ineriartortuartunit nunallu tamalaat akornanni attaveqaatinik tapersersimaneqartunit isumagineqarsinnaanissaat, isumaqarpugullu piginnittut nutaat sullitanut minnerunngitsumillu sulisutsinnut tamakkua neqeroorutigisinnaagaat.
Sullitat nassiussiniarnerminni inuit sullissisorisartagassaat nassiussiartortarfissaallu allannguuteqassanngillat.” Taama oqarpoq Royal Arctic Linep Niuernermut pisortaa Niels Clemensen.
Suliassat nassiussalerinermut immikkoortortaqarfimmut attuumassutillit Islandimiut ingerlatseqatigiiffiutaannut Eimskipimut tunineqarput, tassungalu atatillugu nassiussalerinermi sulisorisat piginnittuulersunit akisussaaffigineqalernerat peqqutaalluni atorfeqartitsinermut tunngatillugu sulisut ilaannut kinguneqartoqassanngilaq.
Annertunerusumik paasisaqarusukkuit saaffissaq:
Tuniniaanermut pisortaq, Niels Clemensen
Mail: nic@ral.gl
Oq.: +299 349111