Uuliamut aningaasallu nalinginut tapiliuttakkap annikillineqarnera

Uuliamut aningaasallu nalinginut tapiliuttakkap piffissami 2022-mi septembarip aallaqqaataanit decembarip 31-anut annikillineqarnera
- Qanoq isumaqarpa?

Namminersorlutik Oqartussat aamma Royal Arctic Line nunarsuaq tamakkerlugu nukissiuuteqarnikkut akit qaffakkiartortut kinguneri pakkersimaarnissaat pillugu kiffartuussinissamik isumaqatigiissuteqarput.

Kiffartuussinissamik isumaqatigiissut uuliamut aningaasallu nalinginut tapiliuttakkap (CAF/BAF) piffissami 2022-mi septembarip aallaqqaataanit decembarip 31-anut annikillineqarnissaanut tunngavoq.

Sumiiffiit sikusartuniittut taakkulu ukiornissaanut peqqumaatissanik pilersorneqarnerisa isumannaarneqarnissaat isumaqatigiissummi immikkut isiginiarneqarpoq.

Nassiussat aalajangersimasumik kissassuseqartitat aamma nassiussat nalinginnaasut immikkoortinneqassapput, aamma isumaqatigiissutip atortussanngortinneqarnera sioqqullugu sumiiffinnut sikusartuniittunut ukiornissaanut peqqumaatissanik pilersuinerup ilaatut nassiussaqartoqarsimasinnaanera isiginiarneqarpoq. Taamaammat oktobarip aallaqqaataata siorna kingornalu nassiussat assartorneqartut immikkoortinneqarput. Piumasaqaatit ataani allassimasut takukkit.

Oktobarip aallaqqaataa sioqqullugu nassiussanut uuliamut aningaasallu nalinginut tapiliuttakkamut akiliutinik utertitsisoqassappat Aningaasaqarnermut Naligiissitaanermullu Naalakkersuisoqarfimmut qinnuteqaammik nassiussisoqassaaq. Qinnuteqaallu kingusinnerpaamik oktobarip 15-iani tiguneqareersimassaaq. Qinnuteqarnermi tunngavissat piumasaqaatini ataani allassimasuni atuarneqarsinnaapput. Qinnuteqaatit suliarineqareerpata akiliutinik utertitsinissamik noqqaassutit Royal Arctic Linemut ingerlateqqinneqassapput. Royal Arctic Line uuliamut aningaasallu nalinginut tapiliuttakkamut akiliutinik utertitsinissamik qinnuteqaatinik tigusaqarsinnaanngilaq, qinnuteqaatit Aningaasaqarnermut Naligiissitaanermullu Naalakkersuisoqarfimmit pisortatigoortumik suliarineqarsimasut kisiisa akuerineqarsinnaapput.

Uuliamut aningaasallu nalinginut tapiliuttakkamut akiliutinik utertitsinissamik qinnuteqaatit uunga nassiunneqassapput:
oed@nanoq.gl

imaluunniit allakkatigut:
Aningaasaqarnermut Naligiissitaanermullu Naalakkersuisoqarfik

Imaneq 4
Postboks 1037
3900 Nuuk

 

Nassiussat oktobarip aallaqqaataa sioqqullugu assartorneqartut

Avannamut nassiussat aalajangersimasumik kissassuseqartitat 2022-mi oktobarip aallaqqaataa sioqqullugu assartorneqartut.
Uuliamut aningaasallu nalinginut tapiliussaq tamakkiisumik utertinneqassaaq.

Piumasaqaatit:

• Nassiussat aalajangersimasumik kissassuseqartitaassapput
• Nassiussat sumiiffinnut sikusartuniittunut apuussassaassapput
• Nassiussat ukiuunera atugassaassapput (ukiornissaannut peqqumaatissat)
• Aningaasat qinnuteqaatigineqartut/utertinneqartut ikinnerpaamik 5000,-iussapput
• Ukiornissaanut peqqumaatissanut aalajangersimasumik kissassuseqartitanut oktobarip aallaqqaataa sioqqullugu Nunatsinnut assartorneqartunut uuliamut aningaasallu nalinginut tapiliuttakkamut akiliutinik utertitsinissamik qinnuteqaat Aningaasaqarnermut Naligiissitaanermullu Naalakkersuisoqarfimmut kingusinnerpaamik oktobarip 15-iani nassiunneqassaaq.

 

Avannamut nassiussat nalinginnaasut 2022-mi oktobarip aallaqqaataa sioqqullugu assartorneqartut
Uuliamut aningaasallu nalinginut tapiliuttakkamut akiliutigineqartut 14%-it ilanngaatigalugit utertinneqassapput.

Piumasaqaatit:

• Nassiussat sumiiffinnut sikusartuniittunut apuussassaassapput
• Nassiussat ukiuunera atugassaassapput (ukiornissaannut peqqumaatissat)
• Aningaasat qinnuteqaatigineqartut/utertinneqartut ikinnerpaamik 5000,-iussapput
• Ukiornissaanut peqqumaatissanut aalajangersimasumik kissassuseqartitanut oktobarip aallaqqaataa sioqqullugu Nunatsinnut assartorneqartunut uuliamut aningaasallu nalinginut tapiliuttakkamut akiliutinik utertitsinissamik qinnuteqaat Aningaasaqarnermut Naligiissitaanermullu Naalakkersuisoqarfimmut kingusinnerpaamik oktobarip 15-iani nassiunneqassaaq.

 

Nassiussat oktobarip aallaqqaataanit assartorneqartut

Avannamut nassiussanut aalajangersimasumik kissassuseqartitanut uuliamut aningaasallu nalinginut tapiliuttagaq oktobarip aallaqqaataanit atorunnaassaaq.
Avannamut nassiussanut nalinginnaasunut uuliamut aningaasallu nalinginut tapiliuttagaq oktobarip aallaqqaataanit 14%-inut appartinneqassaaq.

Qulaani pineqartut 2022-mi decembarip 31-ata tungaanut atuutissapput.

 

/Royal Arctic Line