Tasiilaq decembarip qaammataani umiarsuaqaqqissaaq

Tasiilami sapaatip akunnera kingulleq sakkortuumik piterarnera sanaartornermi atortussanik, pisiniarfigisartakkanit maannakkorpiaq sivisuumik utaqqisariaqakkanik, annertuumik pisariaqartitsinermik kinguneqarpoq.

Taamaammat Royal Arctic Line aalajangerpoq Tasiilaq decembarip qaammataani umiarsuarmik aqqusaaqqinneqassasoq, ilaatigut igalaat taartissaannik apuussinissaq ajoquserinerillu allat sapinngisamik piaarnerpaamik iluarsartuunneqarnissaannut sanaartornermi atortussat pisariaqartinneqartut apuunneqarnissaat qulakkeerumallugu.

Nunatsinnit, Islandimit Danmarkimillu nassiussassannik inniminniisoqarsinnaavoq. Umiarsuarmik aqqusaartitseqqinnissamut pineqartumut nassiussassat Bruarfossip angalaneratigut 245-kkut, Aarhusimit novembarip 25-ani 2022-mi aallartussatut pilersaarutigineqartukkut nassiunneqassapput. Tasiilamut nassiussat Reykjavikkimut niusinnarlugit Irena Arcticamut usineqassapput.

Nuummut, Reykjavikimut Aarhusimullu tunniussinissamut piffissaliussat nalinginnaasut atuutsinneqassapput. Nassiussallu Irena Arcticap angalaneranut 244-mut Nuummit novembarip 26-ani 2022-mi aallartussamut Reykjavikimillu decembarip aallaqqaataani 2022-mi aallartussamut inniminneerneqassapput umiarsuullu decembarip sisamaani Tasiilamut tikinnissaa naatsorsuutigineqarluni.

Aqqusaaqqinnissami pineqartumi Tasiilap pigisaani nunaqarfinnut nassiussassanik inniminniisoqarsinnaanngilaq Nanoq Arctica Kitaata sineriaani Kujataanut pajuttuisussaammat. Tasiilap Danmarkimit tikinneqarnissaa nalinginnaasoq kingulleq novembarip pingajuani pisussatut pilersaarutaagaluarpoq. Nunaqarfinnut ukiornissaanut peqqumaatissanik pajuttuinerit pilersaarutaasut Nanoq Arcticap nunap immikkoortuanit ukioq manna novembarip aqqarngata missaani aallaarnissaa sioqqullugu ingerlanneqassapput.

Islandimit inniminnigassat ugguuna pissapput Lineragency.is@dhl.com