Umiarsuaq Aalborgimit aallartussaq kingulleq
Tukuma Arctica umiarsuarni ingerlaarfimmi aappaaluttumi kingullersaalluni Aalborgimit pingasunngornermi juunip 22-ani 2022 aallassaaq. Royal Arctic Linep angallavigisartakkaminik allanngortiterinerata malitsigisaanik umiarsuaatileqatigiiffiup tamatuma kingorna Danmarkimi umiarsualivik ataasiinnaq aqqusaartalissavaa, tassalu Århusimi umiarsualivik.
Umiarsuaatileqatigiiffiup umiarsualiviup aqqusaartakkami Århusimut siunissami nuunnissaa 2017-imiilli nalunaarutigaa, nunarsuup sinnerani assartuinikkut attaveqatigiit sinnerinut pitsaanerusunik attaveqalernissaq qulakkeerumallugu. Umiarsuaatileqatigiiffittut inuiaqatigiinnik kalaallinik sullissisutut Nunatta nunarsuup sinneranik pitsaasumik niueqateqarsinnaaneranut periarfissai ineriartortissallugit siunissamullu isumannaassallugit pisussaaffigaarput. Umiarsualiviit aqqusaartakkat amerlanerusut pitsaanerusumillu atassuteqartut malitsigisaannik sullitavut niuernissamut amerlanerusunik periarfissaqalissapput, niuertullu sullissisunik amerlanerusunik toqqagassaqalissallutik.
Royal Arctic Linep Aalborgip umiarsualivia 1972-imiilli aqqusaartalerpaa. Ukiunilu 50-it missaanni suleqatigiinneq pitsaalluinnartoq maanna soraartussanngorpoq. Royal Arctic Linep Port of Aalborg peqatigalugu qitiusumik umiarsualiveqarneq pillugu isumaqatigiissutip atorunnaarnissaa piareersaateqarfigisimavaa oqaloqatigiinnernilu ukiuni amerlasuuni suleqatigiissimaneq ersersinneqarpoq illuatungeriillu suleqatigiinneq pitsaasumik angusaqarfiulluartumillu naggaserniarlugu maanna kissaatigaat.
Siunissami tunniussisarfissat aallertarfissallu pillugit paasissutissat marsip qaammataata naannginnerani nalunaarutigineqarnissaat naatsorsuutigineqarpoq.
Annertunerusumik paasisaqarusukkuit CCO Niels Clemensen attavigisinnaavat oqarasuaat + 299 34 91 11-mut imaluunniit email nic@ral.gl