Royal Arctic Line maajip aallaqqaataa 2022 aallarnerfigalugu nutaamik Aningaasaqarnermut pisortartaassaaq

Aningaasaqarnermut pisortarisatta Peter Christoffersenip Royal Arctic Linep aningaasaqarnermik nalorninartunillu aqutsinera 2017-ip naalerneranit allanngortiteriffigaa ineriartortitseqqinnissamut ikorfartuiffiusussamik aarlerinanngitsumik toqqammavissaqalersillugu. Siusinnerusukkullu nalunaarutigineqareersutut umiarsuaatileqatigiiffiup suliamik tunniussinissamut pilersaarutaanut atatillugu 2021-mi ukiakkulli Piitamut taartissamik pissarsiortoqalerpoq.

Taamaalillunilu Jan Egtved Knudsen maajip aallaqqaataa 2022 aallarnerfigalugu Royal Arctic Line A/S-imi Aningaasaqarnermut pisortatut / CFO-tut atorfinitsinneqarpoq Nuummi allaffeqassalluni.

Janip aningaasaqarnikkut nalunaaruteqartarneq, nalorninartunik aqutsineq, akiliisinnaassutsimik aqutsineq periusissiornerlu nunani tamalaani periaatsit tunngavigalugit annertuumik piginnaasaqarfigai - tassungalu ilanngullugu nukissiornermut akinut tunngatillugu nalorninartunik aqutsineq aamma misilittagaqarfigilluarlugu. Jan Danmarkimi umiarsuaatileqatigiiffimmi Thorco Projects A/S-imi 2015-imiilli Executive Vice Presidentitut atuuffeqarpoq, ingerlatseqatigiiffiullu taassuma piginnittuinut, kiisalu Cockett Marine Oilimut, suliniuteqarnikkut suliat 2021-mi ukiakkulli suleqataaffigai.

Jan aningaasaqarneq pillugu siammasissumik ilinniagaqarpoq, ilaatigut Odense Universitetimit (SDU) aningaasalersuineq pillugu Bacheloritut ilinniagaqarpoq, Henley Business Schoolimiillu periusissianik ineriartortitsinermut MBA-mik ilinniagaqarluni.

”Royal Arctic Line Kalaallit Nunaata tamarmi ajornannginnerusumik niueqatigineqarsinnaanngortinnissaa anguniarlugu ineriartorfiujuarpoq, nuannaarutigaarpullu periusissiap tamatuma ikorfartornissaanut Jan suleqatigisinnaagatsigu” pisortaaneq Verner Hammeken oqarpoq.

Jan Egtved Knudsenillu oqaatigaa ”Kalaallit Nunaanni naleqartitat Royal Arctic Linellu inuiaqatigiinnut akisussaaffeqarnera annertuupilussuaq ataqqilluinnarpakka, ingerlatseqatigiiffiullu Kalaallit Nunaatalu ineriartorteqqinnissaannut suleqataanissannut qilanaarpunga”.  

Janip nuliaraa Tina, marlunnik inersimasunik qitornaqarput, taakkulu UK-mi Danmarkimilu najugaqarput.