Royal Arctic Line maajip 15-iani 2022 nutaamik Aningaasaqarnermut pisortartaassaaq
Royal Arctic Linemi siulersuisut Peter Christoffersenip atorfimminit pilersaarutaareersumik tunuarnissaanut atatillugu Jørgen Aqe Møller taartissaatut toqqarpaat.
Jørgen Aqe Møller Royal Arctic Linemi aningaasaqarnermut immikkoortortaqarfimmi Nalorninartunik Suleriaatsinillu pitsanngorsaanermut akisussaasutut atorfeqarpoq 2017-imi atorfigilikkaminik. Jørgen DTU-mi civilingeniøritut ilinniagaqarpoq kingornalu ilinniakkani annertusarpaa Naatsorsuuserinermut Aningaasaqarnermillu aqutsinermut HD-mik kiisalu CBS-imi Aningaasaliinermut tunngasumik HD-mik. Jørgen softwarenik ineriartortitsisartutut, Danmarkimi aningaaserinermik suliaqarfimmi siunnersortitut kiisalu Namminersorlutik Oqartussani Aningaasaqarnermut Naalakkersuisoqarfimmi økonomitut misilittagaqarpoq.
Siulersuisuni siulittaasup Ulrik Blidorfip siulersuisut isumaqatigiissut sinnerlugit oqaatigaa ”Jørgen Aqe Møller ingerlatseqatigiiffiup sulisuisa akornannit Aningaasaqarnermut pisortassatut piukkunnarluinnartutut nalilerneqarluni siulersuisunit toqqarneqartoq. Jørgenip suliatigut tunuliaqutaqarluarnermigut pisortaqatigiinni ingerlatseqatigiiffiup periusissiaanik nutaamik piviusunngortitsisussani suleqataanissaminut piginnaasaqarluarpoq. Jørgenillu CFO-tut/Aningaasaqarnermut pisortatut akisussaaffimmik tigusinissaminik akuersisimanera kissaateqarsimaneralu siulersuisut naammagisimaarluarpaat”.
”Royal Arctic Linemi nuannaarutigeqaarput pikkorissorsuarnik sulisoqaratta pisariartitsiffimmi sassarsinnaasunik” Pisortaaneq Verner Hammeken oqarpoq nangillunilu: ”Jørgen pisortaqatigiinni piginnaasanik uagutsinnut pingaaruteqartupilussuarnik nukittunerulersitsissaaq: Piffissaq ungasinnerusoq eqqarsaatigalugu nalorninartunik sunniuteqarluartumik aqutsisinnaaneq, suleriaatsinik pitsanngorsaanissamut tappiffigisaqarluarneq, tassungalu ilanngullugit inuiaqatigiinni pissutsinik atuuffigisarpullu pingaaruteqarluinnartoq pillugu ilisimasaqarluarneq. Nassuerutigisariaqarparpullu sulisussarsiortarfik ataqqisaasoq aqqutigalugu suliffeqarfiup avataani sulisussarsioraluarluta suliffeqarfiup iluani piukkunnartut sassartinneqarsinnaasimanngimmata, maannali kiisami iluatsippoq aallaqqaataaniit sulisussarsiortariaqaleriataarnitsinni”.
Jørgen Aqe Møller toqqagaanerminut atatillugu ima oqarpoq: ”Pisortaqatigiit sinneri peqatigalugit Royal Arctic Linep ukiuni kingulliunerusuni allanngortiterineri pingaarutillit inuiaqatigiinnut annertunerusumik naleqalersitsinissaat peqataaffigissallugu qilanaarivara. Attaveqaasersuutit pilersinneqartut atorneqarnerisa sullitatsinnut pingaarnernut, inuiaqatigiinnut kalaallinut, ingerlaavartumik pitsanngorsaaviginissaat pissutsinullu nutaanut naleqqussarneqarnissaat suleqataaffigissallugu pissanganarpoq”.
Royal Arctic Line A/S