Arpaarti Arctica Qasigiannguani atserneqarpoq
Royal Arctic Linep umiarsuaataa nunaqarfiliartaat nutaaq, Arpaarti Arctica, Qasigiannguit umiarsualiviani persuarsiutigineqarluni ullumi nal. 14:00 pisortatigoortumik atserneqarpoq.
Umiarsuarmik atsiineq aallarnerlugu erinarsoqatigiit Amaat erinarsorput.
- Arpaarti Arctica piffinnut periarfissanullu nutaanut aqqutissiuissaaq.
Nunarsuarmi sumiiffiit assigiinngitsut umiarsuarnit atassusigaapput. Taamaalillunilu Arpaarti Arctica aamma nunatsinni sumiiffiit tamaasa akornanni, aammalu nunatta nunarsuullu sinnerata akornanni atassuteqarnerup nukittunerulersinneqarneranut takussutissaavoq, inunnut tamanut iluaqutaasussamik, pisortaaneq Verner Hammeken taama oqarpoq.
Tamatuma kingorna umiarsuarmik atsiisoq Johanne Samuelsen oqalugiarpoq.
- Guutiaa nunaga pilluaqqujuk
Nuna asasara
Illit pigisatut taanna paariuk
Nuna najugarput
Perluit kinguleriittuarput
Mallisut malittariillutik
Taakkununnga illit naalagaasoq
Umiarsuaq angalasussaq sernigiuk - Atserpagit Arpaarti Arctica
Umiarsuarmik atsiisup umiarsuaq champagnemik kusanartumik poortorsimasumik umiarsuup saneraanut kuillugu atserpaa, puiaasarlumi pissusissamisut aserorpoq. Tamatuma kingorna Qasigiannguani innuttaasunut tamanut ammasumik umiarsualivimmi kaffillertoqarlunilu kaagillertoqarpoq ”Maasikkut Apollolu” nipilersortoralugit.