Royal Arctic Line Aalborgimi soraarsitsinerit

Silarsuaq ineriartorfiujuarpoq taamatuttaarlu niueriaatsivut periaatsivullu aamma allanngoriartorlutik. Tamanna tamatsinnut atuuppoq, aamma Royal Arctic Linemut. Danmarkip Nunattalu akornanni imaatigut assartuussineq taamaasilluni aamma allanngortussanngorpoq, soorlu aamma ukiut 50-ingajaat matuma siorna taamaalisoqartoq Nunatta pilersorneqarnera Københavnimit Aalborgimut nuunneqarmat.

Taamatut allannguisoqarnerata kingunerisaanik Royal Arctic Linep Aalborg aqqusaartarunnaassavaa Aalborgimilu umiarsualivimmi ukiorpassuarni ingerlatarisagut aamma taamaalillutik unitsinneqassallutik.

Royal Arctic Linemi pisortaqatigiit taamatut allanngortitsisoqarnissaa pillugu Aalborgimi suleqatigiinnermut ataatsimiititaliaq, suliatigut kattuffiit 3F, HK aamma Metal siunnersortigalugit, 2022-mi januaarip aallartinneraniilli isumaqatigiinniaqatigaa. Akissaatitigullu isumaqatigiissutit attuumassutillit annertuumillu soraarsitsinissaq pillugu inatsit naapertorlugu illuatungeriit peqatigiillutik isumaqatigiissuteqarput.

Isumaqatigiinniarnernilu angusat timitalerneqarnissaannut maanna piffissanngorpoq. Taamaammat Royal Arctic Linep quersuarmi, terminalimi sullivimmilu sulisunik 80-it missaanniittunik soraarsitsinissaq aallartisarpaa juunip naanerani aamma decembari naanerani 2022-mi soraarsitsinissamik ilimasaaruteqarnikkut. Allannguuteqartitsineq sulisunut allanut allaffissornermik suliaqartunut sunniuteqassanngilaq.

Aalborgimit naggataamik juunip qaammataata naanerani aallartoqarnissaa Royal Arctic Linep naatsorsuutigaa. Terminalimi ingerlatsisoqaannassaaq kiisalu atortunik Aalborgip umiarsualivianut utertitsinissamut atatillugu suliaqartoqassalluni, tamannalu ukiup naanerani naammassineqartussatut naatsorsuutigineqarpoq.

Royal Arctic Linep pingaartissimavaa Nunatsinnut imaatigut assartuussinerup ineriartortinneqarnerani taama alloriaqqittoqarnerani atuuffiup sivisoorsuup naammassisaqarfiulluartullu sulisutta pikkorissut peqataaffigisimasaat naleqquttumik eqqarsaatigineqassasoq.