Nuummi ingerlatsinerput ingerlaannarpoq, naak corona akornatsinniikkaluartoq

Nuummi umiarsualivik annertuumik terminalarbejderit akornanni coronamik tuniluuffiusimavoq.
Qujanartumik suliffeqarfiup immikkoortortaqarfiisa allat akornannit ikiuisoqarneratigut, umiarsuarnik usingiaaneq ingerlatiinnarneqarpoq, maannalu ajorunnaarsimallutik nalunaaruteqartartut arlaqalermata, akunnerup naanerani umiarsuarnik isumaginninneq kalluarneqassanngilaq.
Tamanna aamma sinerissami umiarsuarnik isumaginninnermut atuuppoq.
Naak Royal Arctic Linep iluani upalungaarsimanissamut pilersaaruteqarluaraluarluta, suli sulisut akornanni tuniluuttoqarnissaa aarlerinaateqarpoq, pisullu maannakkut qanimut malinnaavigineqarput.

Assersuutigalugu selskabip sulisui amerlasuut angerlarsimaffimminnit sulipput, tamannalu kiffartuussivimmit akissutisisarnissamut sunniuteqassaaq.
Taamaattumik sullissivimmut saaffiginnittartut naatsorsuutigisariaqassavaat pisarnermit akissutisisarneq sivisunerulaartassasoq.