Tukuma ulussaarsuaq Malik aqqusaareerlugu kinguaattoortoq

Tukuma Arcticap sapaatit akunneranni uani Nuummut tikinnissaa kinguaattoorpoq sapaatiuppat nal. 12:00 tikissangatinneqalerluni.

Tukuma Arcticap ulussaarsuaq Malik Norgemi Kristiansandip kujataatungaani sapaatit akunneranni kingullermi aqqusaarpaa. Tukuma Arcticap siuata qaavata ilaa umiarsuullu atortorissaarutai allat ajoquserput, tamatumalu saniatigut containerit imaqanngitsut arlallit aamma ajoquserlutik. Umiarsuit anorersuarsiortillutik ajoquserneqartarnerat takornartaanngilaq, Tukuma Arcticalli ajoquserneri nalinginnaasumit annertunerupput. Umiarsuup utaqqiisaasumik iluarsartuunneqareerluni angalanini pilersaarutit malillugit nangeqqippaa.