Nassiussassanik ataasiakkaanik tunniussisarneq Aarhusimut nuunneqassaaq

Royal Arctic Linep nassiussassanik ataasiakkaanik Eimskip Denmark A/S-ip Aarhusimi quersuaani isumaginnittarnissaq pillugu Eimskip Denmark A/S isumaqatigiissuteqarfigaa.

Niuerfimmi suleqatissarsioreernermi Eimskip Denmark A/S-ip suleqatiginissaa toqqarneqarpoq. Taanna ullumikkut Aarhusip Umiarsualiviani quersuarmik ingerlataqareerpoq Savalimmiunut Islandimullu nammineerluni kiffartuussinerminik isumaginnittuulluni. Royal Arctic Linep sullitaata Danmarkip Nunattalu akornanni nassiuttagaasa assinginik isumaginnittarneq Eimskipip annertuumik misilittagaqarfigaa, Danmarkimilu nassiussassanik tamalaanik isumaginnittarneq pillugu suleqatigiinnissarput qilanaarivarput, Royal Arctic Linemi COO, Ivalu Kleist, oqarpoq.

Eimskip Denmark A/S-ip Kalaallit Nunaannut/-nit nassiussanik nalinginnaasunik/nassiussanik tamalaanik tamanik tigusisarneq poortuisarnerlu pillugit Royal Arctic Linemik suleqateqalernissani qilanaarivaa. Suliassaq Atlantikup avannaani usinik isumaginnittarnerup iluani ukiorpassuarni immikkut suliaqarnitsinnik annertusaaneruvoq pissusissamisoortoq, pitsaanerpaamillu Aarhusimi Umiarsualivimmi inissisimaffeqarluni ingerlanneqarpoq sulisunit ukiorpassuarni atorfeqarsimasunit, tamannalu naammattumik eqaatsumillu naammassisaqarsinnaassuseqarnissap qulakkeernissaanut pingaaruteqarluinnarpoq, Jesper Sandahl, Managing Director, Eimskip Denmark A/S, taama oqarpoq.

Nassiussanik tamalaanik tunniussineq aallertarnerlu Royal Arctic Linep Aalborgimi namminerisaminik quersuaatigut maannamut isumagineqartarpoq, Royal Arctic Linelli juunip qaammataata naaneranit Aalborg aalajangersimasumik aqqusaartarunnaassavaa, taamaattumillu nassiussanik tamalaanik isumaginnittarneq nassiussat allat assigalugit Aarhusip umiarsualivianut nuunneqassaaq.

Nassiussanik tamalaanik isumaginnittarnerup qaqugorpiaq nuunneqarnissaa kiisalu tunniussinissamut piffissaliussat kingusinnerusukkut nalunaarutigineqarumaarput.