Tilioq Arctica Narsarmi pisortatigoortumik atserneqarpoq

Royal Arctic Linep nunaqarfiliartaatitaava Tilioq Arctica persuarsiornartumik nalliuttorsiornikkut ullumi Narsap umiarsualiviani atserneqarpoq.

Pitsaaliuinermi siunnersorti palasillu Amandus Petrussenip nuliatalu Frederikke Petrussenip paniat, Bolethe Stenskov, umiarsuaq atserpaa. Bolethe Narsarmijini (Narsaq Kujalleq) 1966-imi inunngorpoq, ueqarpoq pingasunillu erneqarluni. Bolethe inunnik isumaginninnermi siunnersortitut ilinniagaqarpoq peqatigiiffimmilu Arctic Sportimi siulittaasuulluni aamma Kalaallit Nunaanni timersoqatigiit kattuffianni siulittaasup tulleraa. Kalaallit Nunaanni Tae kwon domi siornatigut siulittaasuusimavoq namminerlu qernertumik qitequteqarpoq 4 Dan-imik. Umiarsuarmik atsiisup aalisarneq, asimiinneq, arpanneq, qalipaaneq assassornerlu aallutaralugit aamma nuannarai.

Illoqarfimmi erinarsoqatigiit Nangaasukkut Narsami seqinnarissuup ataani atsiinissaq ammarlugu erinarsorput.

Umiarsuarmik atsiisup Bolethe Stenskovip puiaasap champagnemik imallip umiarsuup saneraanut miloriutinnginnerani, pisortaanerullu tulliata Aviâja Lyberth Lennertip tikilluaqqusilluni oqalugiareernerani, umiarsuaq pillugu ima oqaaseqarpoq: - ” Oqaaseq Tilioq, nassuiassagaanni tassaavoq kammagilluagaq. Umiarsuannguup inuttai angalanissinni ataatsimoorneq ikioqatigiinnerlu pigalugu angalalluarisi aammalu sumiiffinni tamani kammagiinneq anersaaralugu pingaartillugulu takutittuarisiuk.  Tikiffigisartakkaminit tamanit kammagilluarneqartussaanera qularinngilara, kammagiinnerummi nuannersumik misigisitsisarnera qaqugorsuarmut pigineqartarmat.”

Puiaasaq annoraaminermik putoortuusamik kusanarsakkamik puulik umiarsuaq eqqorluarlugu sequmimmat inuppassuit nuannaarlutik nilliallapput. Atsiinerup persuarsiornartortaa naggaserlugu erinarsoqatigiit umiarsuarmik atsiisup kissaatigisimasaa Henrik Lundip taalliaa erinniaalu ”Putsut tamaani issortitersut” erinarsorpaat.

Atsiineq, kaffillerneq nipilersortullu aliikkusersuinerat kiisalu Tilioq Arcticami angallassineq innuttaasut 300-it missaannit peqataaffigineqarpoq.

Kaffillerneq nipilersoqatigiillu Igalikormiut kinguaavi nipilersornerat ornigarneqarluarput qiimmallaataallutillu, umiarsualivimmilu ullormut puigunaatsumut Narsarmiut takkussimasut tamaasa Royal Arctic Linep qujaffigai.