Royal Arctic Line Sikuiuitsumut kujallermut angalaqqittoq
Suliassaq Royal Arctic Linemut Malik Arcticamilu inuttanut misilittagaqaluartunut nutaajunngilluinnarpoq. Naja Arcticammi Tysklandimi ilisimatuut misissuisoqarfiat Alfred Wegener Institut (AWI) sinnerlugu 2007-imi ilisimatuut misissuisoqarfiannut Neumayer Station III-mut angalanerata kingorna, umiarsuaatileqatigiiffik ukioq ataaseq eqqaassanngikkaanni ukiut tamaasa ukiulernerani Nunatsinnilu sikuunerani umiarsuarmik Sikuiuitsumut kujallermut angalatitsisarpoq. Umiarsuaq Mary Arctica, Malik Arcticap assinga, taamaalilluni Norgemiut ilisimatuutut misissuisoqarfiannut Trollimut peqqumaatissanik ukiuni kingullerni aqqaneq marlunni aalajangersimasumik pajuttarpoq, ilaatigullu Tyskit Belgiamiullu ilisimatuutut misissuisoqarfiat aamma ataasiakkaanik aqqusaarneqartarsimalluni.
AWI taassumalu Afrikami kujallermi sullissisua ukioq manna isumaqatigiissuteqarfigineqarput. Tyskit ilisimatuutut misissuisoqarfiat Neumayer III Akta Bayimi inissisimavoq, orsussamillu, inuussutissanik maskiinanillu tamalaanik tassunga pajuttoqassaaq. Malik Arctica Bremerhavenimi usilersorneqarpoq peqqumaatissanillu nutaanik aallerluni Cape Townimut aqqusaareeruni suli kujasinnerusumut ingerlaqqissaaq, tassanilu sikup sinaatigut ilaatigut meterit 15-it tikillugit portussuseqarsinnaasukkut usingiarneq imaannaanngitsoq pissaaq. Kivitsinissarlu ataaseq immikkut nakkutigeqqissaarneqassaaq, kivittaammi tonsinik 40-ngajannik oqimaatsigisoq ilisimatuutut misissuisoqarfimmi Neumayer III-mi ukiuni tullerni marlussunni atorneqartussaq usingiarneqartussaavoq.
Malik Arctica containerilersuutaavoq sikusiutissiatut qaffasinnerpaamik allagartalik timitaalu immikkut qajannaarsagaalluni, taamaattumillu sikup sinaatigut suliaqarnissamut immikkut piukkunnaateqarluni. Sikuiuitsumut kujallermut angalanermi inuttat siornatigut sumiiffimmut angalaqataareersimasunik angalaqateqarnissaat Royal Arctic Linep tamatigut qulakkeertarpaa, siullerpaamik taqqavunga angalaqataasut ilinniartinneqarnissaat qulakkeerumallugu. Taamaaliornikkullu angalanermi matumani sullissinneq pitsaalluinnartoq qulakkeerneqassaaq peqatigisaanillu pingaarnerusutut piginnaaneqarfigisat umiarsuaatileqatigiiffimmi siunissamut attatiinnarneqarlutik – sumiiffimmi sumiissusersiornerup suliaqarnerullu sikut silallu qanoq inneri pissutigalugit immikkut unammilligassaqarfiusinnaasartumi.
- Sikuiuitsumi kujallermi sullittakkatta pingaarnerusutut piginnaaneqarfigisatsinnik kingumut neqeroorfigisinnaanerat nuannaarutigalugulu tulluusimaarutigaarput, tassalu issittumi tikikkuminaatsuni sullissisinnaaneq. Tamatumunngalu peqatigitillugu ukiup ilaani Nunatsinni piffissap suliaqarnerpaaffiusup avataaniittumi umiarsuaq atorneqanngikkallartoq atorluarparput, Royal Arctic Linemi Chief Commercial Officer, CCO Niels Clemensen, taama oqarpoq.
Paasissutissat sukumiinerusut uunga piniarneqarsinnaapput: Niels Clemensen, oqar.: +299 34 91 11, mail: nic@ral.gl