Nunatsinni innarluuteqarnerup paasinniffigineqarnerunissaa ilisimasaqarfigineqarnerunissaalu siuarsassavarput

Royal Arctic Line A/S aamma Innarluutillit Illersuisoqarfiat Tilioq februaarip qaammataata naalernerani 2021-mi piviusulersaarutip ”Uanga innarluutigaanngilanga”-p takuteqqaarneqarnissaanut aningaasaliinissamik isumaqatigiissusiorput. Piviusulersaarut, aammalu ilinniartitsissutit piviusulersaarullu tunngavigalugu oqaloqatigiissutaasinnaasunut ilitsersuutit, Tiliup maanna suliaritippai. Innarluutillit ulluinnarsiutaannik, iluatsitsiffiinik ajorsarfiinillu isiginnaagassiornermi innarluutillit inuunerannik inuiaqatigiit paasinninnerulernissaat anguniarneqarpoq.   

”Sunaluunniit tapiissutigineqartartoq suliatsinnut isumalerujussuusarpoq. Royal Arctic Linep aningaasaliinera peqqutaalluni piviusulersaarut siammasinnerusumut apuunneqassaaq aammalu nunatsinni atuarfinnut tamanut apuunneqassalluni.
Taamaattumik suliatta qanoq isumaqartiginera, ingammillu innarluutillit inuunerannik inuiaqatigiit paasinninnerulernissaata pingaaruteqassusia Royal Arctic Linemit takuneqarsinnaammat assut nuannaarutigivarput”
- Innarluutillit illersuisuat, Christina Johnsen.

”Suliffeqarfittut inuiaqatigiinnut akisussaaqataagatta tulluusimaarutigaarput Tilioq peqatigalugu nunatsinni innarluutilinnut atugassarititaasut pillugit annertunerusumik paasissutissiinissamut aningaasaliisinnaagatta. Qularinngilarpullu inuiaqatigiinni nuannaarutaajumaartoq.
- Royal Arctic Linemi aningaasaliisarnermut ataatsimiititaliaq sinnerlugu Ann-Britta A. Olsvig

Piviusulersaarusiap takuteqqaarneqarnissaa aammalu ilinniartitsissutit inerisarneqarnissaat Royal Arctic Linep aningaasaliiffigissavai, tamannalu kr. 110.000,00-inik naleqarpoq.