Nuummi upalungaarsimaneq annikillisinneqarpoq

Ualimut nal. 17:00 Naalakkersuisut tusagassiortunik katersuutsitsineranni nalunaarutigineqarpoq killilersuutit tallimanngormat atuutsinneqalersut unnuaru unnuap qeqqaniit atorunnaarsinneqassasut.

Taamaalilluni Nuummiit aallarsinnaatitaannginneq unnuaru atorunnaassaaq, inuillu katersuuttarfiini anersartuutinut assiaquteqarnissamik piumasaqaat aamma atorunnaassalluni.

Tamanna tunngavigalugu Royal Arctic Linep aalajangerpaa Nuup umiarsualiviani killilersuutit annikillisinneqaqqissasut. Taamaalilluni umiarsualivik nalinginnaasumik ingerlaleqqissaaq marlunngorneq juunip aallaqqaataa aallarnerfigalugu.

Sullitavut qinnuigissavagut illersuutitut innersuussutit suli maleqqullugit, taakkununnga ilaallutik isinnginnermi assaat sprit-ertarnissaat, inunnut allanut qanillinaveersaarnissaq attornaveersaarnissarlu.