Siuana Arctica Upernavimmi nalliuttorsiualaarnermi atserneqarpoq

Royal Arctic Linep nunaqarfiliartaatitaava Siuana Arctica persuarsiornartumik nalliuttorsiornikkut ullumi Upernaviup umiarsualiviani atserneqarpoq. 29-nik ukiullip Louise Karlsenip, Upernavimmi Royal Arctic Linep umiarsualiviani pisortaasup, umiarsuaaraq atserpaa. Inuit 900-t missaanniittut atsiinermut, kaffillernermut nipilersornermullu aammalu Siuana Arcticamut takornariarnissamut peqataajartorlutik takkupput.

Upernavimmi erinarsoqatigiit EP-53-ip silagissuugaa seqinnarissuugaalu atsiineq ammarpaat.

Pisortaanerup Verner Hammekenip tikilluaqqusereernerani atsiisussap Louise Karlsenip, puiaasap champagnemik imallip umiarsuup saneraanut miloriutinnginnerani oqaatsit uku umiarsuarmut tunniuppai: - Illoqarfitsinnut nunaqarfitsinnullumi neriuummik nukissamillusooq pajupputit. Aqqutigisagassanni qatsungasumi mallersumilu tikittarninni aallartarninnilu neriulluarfigalutit, ajunnginnerpaanik kissaalllutit angalalluarna. Atserpakkit Siuana Arctica. 

Puiaasaq annoraaminermik putoortuusamik kusanarsakkamik puulik umiarsuaq eqqorluarlugu sequmimmat inuppassuit nuannaarlutik nilliallapput. Atsiinerup persuarsiornartortaa naggaserlugu erinarsoqatigiit EP-53 erinarsorput atsiisup inuusuttup kissaataa ”Qujavunga”, Tønnes Kreutzmannip erinniaa taalliaalu, atorlugu.  

Upernavimmi kiaqisumi aasarissumilu kaffillerneq aammalu qatanngutigiit Marthin aamma Samuel Mørchikkut nipilersornerat ornigarneqarluarput qiimmallaataallutillu, umiarsualivimmilu ullormut puigunaatsumut takkussimasut tamaasa Royal Arctic Linep qujaffigai.